धनगढी । सुदूरपश्चिम प्रदेशका मुख्यमन्त्री कमलबहादुर शाहले लगानीकर्ताहरूको सुझावअनुसार लगानीमैत्री वातावरण बनाउन प्रदेश सरकार तयार रहेको बताएका छन् ।

शनिबार काठमाडौंमा हिन्दु इकोनोमी फोरमका प्रतिनिधिहरूसँगको भएको अन्तरक्रिया कार्यक्रममा उनले स्वदेशी तथा विदेशी सबै लगानीकर्तालाई सुदूरपश्चिममा स्वागत गर्न आफूहरू आतुर रहेको बताएका हुन् ।

‘सुदूरपश्चिममा लगानीकर्तालाई स्वागत गर्न हामी आतुर छौँ,’ मुख्यमन्त्री शाहले भने, ‘हामी लगानीमैत्री वातावरण बनाउँछौँ, तपाईंहरूको निर्धक्क भएर लगानी गर्नुहोस् ।’

मुख्यमन्त्री शाहले सुदूरपश्चिमलाई हेर्ने दृष्टिकोण परिवर्तन गर्न पनि आग्रह गरे । उनले सुदूरपश्चिममा समस्या मात्रै रहेको भनाइलाई खण्डन गर्दै त्यहाँ समस्याभन्दा कैयौँ गुणा बढी सम्भावना रहेको बताए । मुख्यमन्त्री शाहले केही समयअघि भारत भ्रमणमा भारतीय मुख्यमन्त्रीहरूसँग सुदूरपश्चिममा लगानी ल्याउनेबारे छलफल भएको उल्लेख गर्दै यसपटकको लगानी सम्मेलनमा भारततर्फबाट लगानी आउने अपेक्षा व्यक्त गरे । तीनै तहको सरकार सुदूरपश्चिममा लगानी भित्र्याउन सकारात्मक रहेको उनको भनाइ थियो ।

अन्तरक्रिया कार्यक्रममा सुदूरपश्चिम प्रदेशका मुख्यमन्त्री शाहसहितको टोलीलाई हिन्दु इकोनोमी फोरमका प्रतिनिधिहरूले सुदूरपश्चिमको धार्मिक पर्यटनमा लगानी भित्र्याउन भूमिका खेल्ने बताएका थिए । उनिहरुले विश्व हिन्दु इकोनोमिक्समार्फत सुदूरपश्चिम प्रदेशका धार्मिक पर्यटन क्षेत्रमा लगानी ल्याउन पहल गर्नेमा जोड दिएका थिए ।

‘हामी विश्वभर रहेका हिन्दुहरू मार्फत नेपालमा लगानी ल्याउने विषयमा छलफल गरिरहेका छौँ,’ नेपाल संयोजक सुरज बैद्यले भने, ‘सुदूरपश्चिम प्रदेशमा पनि धेरै धार्मिक स्थल छन । त्यहाँ लगानी भित्र्याउने विषयमा पनि हामी छलफल गर्छौँ ।’

नेपाल उद्योग वाणिज्य महासंघका पूर्व अध्यक्ष समेत रहेनु भएका बैद्यले सुदूरपश्चिम प्रदेशमा यसअघि पनि सम्भावनाबारे गरिएको अध्ययनका निष्कर्ष प्रस्तुत गरेका थिए । उनले नीतिगत कारण लगानी भित्र्याउन समस्या भएको भन्दै लगानीमैत्री नीति बनाउन मुख्यमन्त्री शाहलाई सुझाव दिए । लगानी सम्मेलनमा प्रतिबद्धता अनुसारको लगानी नआएको भन्दै उनले विशेष क्षेत्रलाई प्राथमिकतामा राखेर लगानीकर्ताहरूलाई आह्वान गर्नुपर्ने बताए ।

पूर्व राजदूत समेत रहेनु भएका हिन्दु इकोनोमिक्स फोरमका महासचिव महेश दाहालले विश्वका हिन्दुहरूको चासो नेपालतर्फ रहेको भन्दै उनीहरू मार्फत लगानी ल्याउन सकिनेमा जोड दिए । सुदूरपश्चिममा हिन्दुहरूको ठूलो आस्था र केन्द्र रहेको भन्दै धार्मिक पर्यटन प्रवद्र्धनमा जोड दिन सकिने उनको भनाइ थियो ।

उद्योग वाणिज्य महासंघका पूर्व अध्यक्ष कुशकुमार जोशीले पनि सुदूरपश्चिममा पर्याप्त सम्भावना रहेको भन्दै नीजी क्षेत्र त्यहाँ लगानी गर्न उत्साहित भएको बताए । प्रधानमन्त्रीको भारत भ्रमणका बेला भारतीय प्रधानमन्त्रीसँग विभिन्न नाकाहरूलाई व्यावसायिक नाका बनाउनुपर्ने विषयमा कुरा गर्नुपर्ने सुझाव समेत उनले दिए ।

पूर्व गभर्नर चिरञ्जीवी नेपालले पनि सुदूरपश्चिमको विकास र लगानीका विषयमा आफूहरू गम्भीर रहेको भन्दै संसारभरिका हिन्दुहरूलाई सुदूरपश्चिमको सम्भावनामा लगानी गर्न आग्रह गर्ने बताए । उनले उत्तर प्रदेश र उत्तराखण्डका लगानीकर्ताहरूसम्म मात्र पुग्दा पनि सुदूरपश्चिम लगानी तथा विकास सम्मेलन सफल हुने दाबी गरे ।

‘भारत र चीनलाई ट्रान्जिट बनाउनुपर्छ, हामीले दुवै देशलाई लगानी गर्न आग्रह गर्नुपर्छ,’ पूर्व गभर्नर नेपालले भने, ‘अहिले उत्तर प्रदेश र उत्तराखण्डका लगानीकर्ताहरुलाई ल्याउन पहल गर्नुपर्छ ।’

छलफलमा सुदूरपश्चिम प्रदेशको सम्भावना र अवस्थाबारे नीति तथा प्रदेश योजना आयोगका सदस्य नृप सुनारले कार्यपत्र प्रस्तुत गरेका थिए । अन्तरक्रिया कार्यक्रममा परियोजना विज्ञ दिलीप भट्टले मंसिर १ र २ गते हुने लगानी तथा विकास सम्मेलनको तयारी र प्राविधिक पक्षबारे जानकारी दिएका थिए ।