धनगढी । सुदूरपश्चिम प्रदेशमा आगामी फागुन २१ गते हुने प्रतिनिधिसभाको निर्वाचनका लागि ४६ हजार २० जनाले मतदाता नामावलीमा नाम दर्ता गराएका छन् ।
गत असोज १० गतेदेखि यही मङ्सिर ५ गतेसम्म सञ्चालन भएको नयाँ मतदाता नामावली दर्ता अभियानमा राष्ट्रिय परिचयपत्रमार्फत र निर्वाचन कार्यालयमा पुगेर नाम दर्ता गराएका हुन् ।
प्रदेशभरी राष्ट्रिय परिचयपत्रमार्फत २९ हजार चार सय ३९ जना र कार्यालयमा पुगेर १६ हजार पाँच सय ८१ जनाले मतदाता नामावलीमा नाम दर्ता गराएको प्रदेश निर्वाचन कार्यालय धनगढीका प्रमुख प्रेमराज भट्टले जानकारी दिए ।
उनका अनुसार कैलालीमा राष्ट्रिय परिचयपत्रमार्फत १२ हजार एक सय १३ र कार्यालयमा पुगेर छ हजार एक सय गरि १८ हजार दुई सय १३ जनाले,कञ्चनपुरमा राष्ट्रिय परिचयपत्रमार्फत आठ हजार ९२ र कार्यालयमा पुगेर चार हजार एक सय ९९ गरि १२ हजार दुई सय ९१ जना तथा बैतडीमा राष्ट्रिय परिचयपत्रमार्फत एक हजार आठ सय ४८ र कार्यालय पुगेर आठ सय चार गरि दुई हजार छ सय ५२ जनाले नाम दर्ता गराएका छन् ।
त्यस्तै,दार्चुलामा राष्ट्रिय परिचयपत्रमार्फत एक हजार एक सय ९८ र कार्यालय पुगेर एक हजार चार सय ३० गरि दुई हजार छ सय २८ जनाले,अछाममा राष्ट्रिय परिचयपत्रमार्फत एक हजार पाँच सय ३६ र कार्यालय पुगेर एक हजार ६८ गरि दुई हजार छ सय चार जना तथा बझाङमा राष्ट्रिय परिचयपत्रमार्फत एक हजार चार सय १२ र कार्यालय पुगेर नौ सय ३३ गरि दुई हजार तीन सय ४५ जनाले मतदाता नामावलीमा नाम दर्ता गराएको उनले जानकारी दिए ।
कार्यालय प्रमुख भट्टका अनुसार डडेल्धुरामा राष्ट्रिय परिचयपत्रमार्फत एक हजार दुई सय ७२ र कार्यालय पुगेर छ सय २० गरि एक हजार आठ सय ९२,डोटीमा राष्ट्रिय परिचयपत्रमार्फत एक हजार दुई सय ७९ र कार्यालय पुगेर पाँच सय ९९ गरि एक हजार आठ सय ७८ तथा बाजुरामा राष्ट्रिय परिचयपत्रमार्फत छ सय ८९ र कार्यालय पुगेर आठ सय २८ गरि एक हजार पाँच सय १७ जनाले मतदाता नामावलीमा नाम दर्ता गराएका छन् ।
मतदाता नामावलीमा नयाँ नाम दर्ता गराएकाहरुको प्रमाणिकरण हुने क्रम जारी रहेकाले थपिने मतदाताको सङ्ख्या प्रमाणिकरणपछि मात्रै यकिन हुने उनले जानकारी दिए ।
कार्यालय पुगेरभन्दा राष्ट्रिय परिचयपत्रमार्फत नाम दर्ता गराउनेको सङ्ख्या बढी रहेको कार्यालयले जनाएको छ । राष्ट्रिय परिचयपत्र बनाएकाले सिधै अनलाइनमार्फत नाम दर्ता गराउन सक्ने व्यवस्था गरिएपछि सजिलो भएको थियो ।
विसं २०७९ को प्रतिनिधिसभाको निर्वाचनमा प्रदेशभरी १६ लाख ७४ हजार छ सय २३ मतदाता रहेका प्रदेश निर्वाचन कार्यालयले जनाएको छ ।
