धनगढी । नेपाली कम्युनिष्ट पार्टीका संयोजक तथा पूर्वप्रधानमन्त्री पुष्पकमल दाहाल ‘प्रचण्ड’ले नेपाली कम्युनिष्ट पाटीलाई एक नम्बरको पार्टी हुन कसैले नरोक्ने बताएका छन् ।
शुक्रबार धनगढीमा आयोजित सुदूरपश्चिम प्रदेशस्तरीय पार्टी एकता सन्देश सभामा बोल्दै उनले यस्तो बताएका हुन् ।
उनले भने ‘आगामी निर्वाचनमा हामी एक नम्बरको पार्टी बन्यौँ,बन्र्यौँ कसैले रोक्न सक्दैन् । देशभरीबाट हाम्रो पार्टीमा जोडिने बढिरहेका छन् ।’
उनले इतिहासमै पहिलो पटक १५ कम्युनिष्ट विचार भएका शक्ति मिलेको बताउँदै देशभरीका क्रान्तिकारीहरुले यसलाई आशा र भरोसाका साथ हेरिरहेको उनले बताए ।
उनले भने ‘राष्ट्रको आवश्यकता,जनताको आकांक्षा परिपूर्तिका लागि हामी यस पार्टीमा अन्य वामपन्थी शक्तिलाई पनि जोड्न चाहान्छौँ । एमाले भित्रका सबै क्रान्तिकारीलाई पनि म आउन आग्रह गर्न चाहान्छु ।’
राष्ट्रको रक्षा,भौगोलिक अखण्डताको रक्षाका लागि सबै वामपन्थी धु्रवीकरण आवश्यक रहेको उनले बताए ।
संयोजक प्रचण्डले नयाँ समाजवादी नेपाल निर्माणको संकल्पमा आउन सबैमा आह्वान गरे ।
उनले जेननी पुस्ताले उठाएका मागहरु विगतमा आफूहरुले पनि उठाउँदै आएको बताउँदै जेनजीका मुद्दामा सुरुदेखि नै आफूहरुले समर्थन गरेको बताए ।
त्यस्तै उनले आफू प्रधानमन्त्री हुँदा सुदूरपश्चिमको विकासमा जोड दिँदै आएको बताउँदै यहाँका विभिन्न राजमार्ग,मेडिकल कलेज,सुख्खा बन्दरगाह,महाकाली करिडोर,पश्चिम सेती परियोजनामा निरन्तर ध्यान दिएको बताए ।
