डोटी । डोटीमा जिप दुर्घटना हुँदा १२ जना घाइते भएका छन् । जिल्लाको आदर्श गाउँपालिका–४ ल्वारेगडा क्षेत्रमा दिपायलबाट गोरेलीतर्फ जाँदै गरेको सुपप्र ०२–००१ च ११३५ नम्बरको बोलेरो जिप दुर्घटना भएको प्रहरीले जनाइएको छ ।
आइतबार साँझ बोलेरो जिप अनियन्त्रित भई करिब १ सय मिटर तल खोल्सामा खसेको जिल्ला प्रहरी कार्यालय डोटीले जनाएको छ ।
प्रहरीका अनुसार जिप चालक आदर्श गाउँपालिका–४ भुवा बस्ने २९ वर्षीय मोहन विष्टसहित १२ जना घाइते भएका छन् । दुर्घटनामा घाइते भएकामध्ये अधिकांशको अवस्था सामान्य रहेको प्रहरीले जनाएको छ । उनीहरूलाई तत्काल उद्धार गरी काँणीस्याउले जीडी पोलिक्लिनिकमा उपचारका लागि पठाइएको जनाइएको छ ।
घाइतेहरूमा २१ वर्षीया भगवती बिक, ५ वर्षीया रितिका बिक, १ वर्षीय राजन बिक,३८ वर्षीया टीका बिक, १९ वर्षीय शेर बिक, १८ वर्षीया सरस्वती ओझा,३५ वर्षीय लालबहादुर विष्ट, २५ वर्षीय दिल्लीराज ओझा , २३ वर्षीया बिष्ना ओझा, २२ वर्षीय सन्तोष विष्ट र ४ वर्षीय दीपेश ओझा रहेका छन् ।
उद्धारका लागि प्रहरी निरीक्षक पदमराज पन्तको कमान्डमा ९ जनाको प्रहरी टोली खटिएको थियो । दुर्घटनाको कारणबारे प्रहरीले थप अनुसन्धान गरिरहेको जनाएको छ।
