धनगढी । सुदूरपश्चिम प्रदेशका भूमि व्यवस्था,कृषि तथा सहकारीमन्त्री वीरबहादुर थापाले पशुजन्य उत्पादनको गुणस्तर वृद्धि गर्नुपर्ने बताएका छन् ।
मंगलबार राष्ट्रिय पशुपन्छी स्रोत व्यवस्थापन तथा प्रवद्र्धन कार्यालयले धनगढीमा आयोजना गरेको पशुपालन असल अभ्यास(जीएचपी) कार्यान्वयन सम्बन्धी प्रादेशिक अन्तरक्रिया कार्यक्रममा बोल्दै उनले यस्तो बताएका हुन् ।
उनले भने ‘व्यावसायिक पशुपालक किसान जीएचपीमा जोडिन आवश्यक देखिएको छ । दूध तथा मासुजन्य पदार्थको उत्पादन वृद्धि गर्नुका साथै स्वस्थ र गुण्स्तरीय बनाउन आवश्यक छ । यहाँको उत्पादनलाई विदेशसम्म पठाउन चुनौति छ ।’
उनले अहिलेसम्म आफ्नो लोगो लगाएर विदेशसम्म दूध तथा मासुजन्य पदार्थको निर्यात गर्न नसकिएको बताउँदै यसका लागि किसान जीएचपीमा जोडिनु पर्ने बताए ।
उनले भने ‘खोरेत रोगका कारण दूधजन्य,मासुजन्य पदार्थ बाहिर निर्यात गर्न सकिरहेका छैनौँ । हामीले हाम्रो उत्पादन विदेशी बजारसम्म पु¥याउन नसके फाइदामा जान सकिदैन् ।’
त्यस्तै,बजारीकरण र प्रशोधनमा कमजोर भएका कारण किसानको उत्पादन खेर जाने गरेको उनले बताए । उनले प्रदेश सरकारले राम्रो गर्ने किसानलाई प्राथमिकतामा राखेर काम गरिरहेको समेत बताए ।
भूमि व्यवस्था,कृषि तथा सहकारी मन्त्रालयका प्रदेश सचिव शंकर शाहले पशुपालन असल अभ्यास अहिलेको आवश्यकता भएको बताए । उनले भने ‘समयानुसार परिवर्तन ल्याउन नसके सफलता मिल्दैन । समयानुसार परिस्कृत गर्दै जानुपर्छ ।’
उनले भने ‘व्यवसायिक किसानका लागि गुणस्तरका कुरा छन् । वैदेशिक नीति कानूनका कुरा छन् । यसका लागि जीएचपी आवश्यक छ ।’
उनले व्यवसायिकरण गर्न नसके कृषिमा आत्मनिर्भर हुन नसक्ने बताउँदै उनले निर्यात पनि गर्न नसकिने बताए । त्यस्तै,उनले सामुहिक कृषि आवश्यक रहेको बताए ।
राष्ट्रिय पशुपन्छी स्रोत व्यवस्थापन तथा प्रवद्र्धन कार्यालयका प्रमुख डा. चन्द्र ढकालले जीएचपीलाई अनिवार्य बनाए किसानलाई हरेक क्षेत्रमा सहज हुने बताए । उनले यसले सरकार किसानको सम्बन्धसमेत बढाउने उनले बताए ।
किसानको सहजताका लागि जीएचपी ल्याइएको बताउँदै पशुपालक किसानलाई यसमा जोडिन उनले आग्रह गरे ।
कार्यक्रममा राष्ट्रिय पशुपन्छी स्रोत व्यवस्थापन तथा प्रवद्र्धन कार्यालयका वरिष्ठ पशु विकास अधिकृत डा. आभास पौडेलले पशुपालन असल अभ्यास निर्देशिका–२०८० को बारेमा प्रस्तुतिकरण राखेका थिए ।
पछिल्लो समय उपभोक्ताले गुणस्तरीय वस्तुको माग गरिरहेको बताउँदै उनले किसानले स्वच्छतामा ध्यान दिए नदिएको सुनिश्चित गर्नुपर्ने बेला आएको बताए ।
देश तथा विदेशमा दूध तथा मासुजन्य पदार्थको सुनिश्चिता गर्न निर्देशिका जारी गरिएको उनले बताए । असल अभ्यासका लागि खोर व्यवस्थापन,पशु आहार,पशु कल्याण,फार्म रेकर्ड,जैविक सुरक्षा,पशु स्वास्थ्य,प्रजनन,वातावरण संरक्षण आवश्यक हुने उनले बताए ।
पशुपालन असल अभ्यासको प्रमाणीकरणका लागि सुरुमा स्थानीय तहको पशुसेवा शाखाले फर्मको चेकलिष्ट गरेर प्रदेश सरकारलाई सिफारिस गर्ने र प्रदेश सरकारले तालिम प्राप्त प्राविधिक परीक्षकबाट परीक्षण गरि प्रमाणिकरण समितिले संघीय प्रमाणिकरण समितिमा पठाइ आवश्यक अनुगमनपछि किसानले जीएचपीको प्रमाणपत्र प्राप्त गर्ने उनले बताए ।
उनले हाल गाईभैंसी पालन र बंगुर पालन फार्मका लागि मापदण्ड स्वीकृत भइसको उनले बताए । अहिले जीएचपी ऐच्छिक भएपनि भविष्यमा अनिवार्य हुने उनले बताए ।
कार्यक्रममा पशुपालक किसानले सरकारले अनुदान तथा खोप लगायतमा ध्यान दिन आवश्यक रहेको बताएका थिए ।
