धनगढी । कैलालीको धनगढी उपमहानगरपालिका–६ मटियारीका बिखलु राना प्रायः तरकारी बारीमै व्यस्त हुन्छन् । तरकारी लगाउनु,गोडमेल गर्नु,तरकारी लगेर बजारमा बेच्नु उनको दिनचर्या नै बनेको छ ।
उमेरले ५२ वर्षीय राना बिगत २५ वर्षदेखि व्यवसायिक तरकारीखेती गर्दै आएको बताउँछन् । १० कठ्ठा जग्गामा व्यवसायिक तरकारीखेती गरेको बताउँदै उनले अहिले बारीमा बन्दा,काउली,ब्रो काउली,खुर्सानी,टमाटर,भाजी,मूलालगायतका तरकारी लगाएको बताए ।
दिनभरी तरकारी बारीमा व्यस्त हुने राना बिहानपख भने बजारमा तरकारी बिक्रीका लागि जाने गरेका छन् । उनले तरकारी बिक्रीबाट मनग्य आम्दानी गर्दे आएको छन् ।
अहिले बजारमा दैनिक २ हजार ५ सयसम्मको तरकारी बिक्री गर्ने गरेको उनी बताउँछन् । उनले भने ‘सिजनमा राम्रै बिक्री हुन्छ । कम बिक्री भएको दिन २ हजारसम्म र बढी बिक्री भएको दिन २ हजार ५ सय सम्म आम्दानी हुन्छ ।’
राना भन्छन् ‘तरकारी बारीमा गरेको मेहनत खेर जादैन् । तरकारी खेतीबाट भएको आम्दानीले आरामले घरखर्च चल्छ ।’
जग्गा बाँझो नराख्ने आफ्नो मान्यता रहेको बताउँदै रानाले बारीमा जग्गा खाली रहेको ठाउँमा तरकारी लगाइहाल्ने गरेको बताए । उनले मौसमी र बेमौसमी दुबै किसिमका तरकारी उत्पादन गर्ने गरेको बताए ।
उनले भने ‘तरकारीखेतीबाट आम्दानी राम्रै भएको छ । वार्षिक ५ लाखसम्म त जसरी पनि आम्दानी हुन्छ । ८ जनाको परिवार छ । यसैबाट भएको आम्दानीले घर खर्च चलेको छ ।’
‘यसैबाट भएको आम्दानीले तरकारी बारीमा सिंचाइका लागि बोरिङ हालेको छु’ उनले भने । तरकारी खेतीमा मेहनतका साथ काम गरे रोजगारीका लागि यताउता भौतारिन नपर्ने उनको भनाइ छ ।
उनले भने ‘गरे के हुँदैन र ? आफ्नै बारीमा काम गरेको छु । रोजगारी खोज्नु परेको छैन् । स्वरोजगार भइएको छ । घरमै बसेर काम गर्न पाइएको छ ।’
