काठमाडौँ । मन्त्री कुलमान घिसिङ संरक्षक रहेको उज्यालो नेपाल पार्टीले पाँच तहको पार्टी संरचना बनाउने भएको छ । बुधवार औपचारिक रूपमा घोषणा गरिएको उक्त पार्टीको घोषणापत्रमा संघीय, प्रदेश, जिल्ला, स्थानीय तह र वडा तहमा आधारित संरचना बनाउने उल्लेख छ ।

घोषणापत्रमा ‘सङ्गठन संरचना र कार्यप्रणाली’ उपशीर्षकमा सैद्धान्तिक स्पष्टता, नेपालको उज्यालो भविष्य निश्चित गर्ने राजनीतिक कार्यक्रम एवं नयाँ सङ्गठन संरचना र कार्य प्रणालीसहित नेपाली विशेषताको सामाजिक न्यायमा आधारित समृद्ध नेपाल निर्माणको नेतृत्व गर्ने अवसर प्राप्त भएको उल्लेख छ ।

‘समाजको चेतनास्तर र चिन्तन प्रणालीलाई मध्यनजर गर्दै आगामी रणनीतिहरू तयार गर्नु र सोही अनुसारको सङ्गठन संरचना र कार्यप्रणाली कार्यान्वयन गर्नु नै हाम्रो साङ्गठनिक प्रस्थानविन्दु हो’,घोषणापत्रमा भनिएको छ ।

त्यस्तै पार्टीले संघीय, प्रदेश, जिल्ला, स्थानीय तह र वडातहमा आधारित संरचना बनाउने तथा संघ र प्रदेशको संरचनामा भौगोलिक, गैर–भौगोलिक र समावेशी समूह विभाजन गर्न सकिने जनाएको छ ।

पार्टी दल दर्ता गर्ने क्रममा निर्वाचन आयोगमा बुझाएको विधान र घोषणापत्र लगायत सबै विवरणहरू अन्तरिम प्रयोजनको लागि तयार गरिएको भन्दै आम निर्वाचनमा सहभागी हुनुपूर्व वा पछाडिको उपयुक्त समयमा राष्ट्रिय सम्मेलन वा महाधिवेशन मार्फत पार्टीका सम्पूर्ण दस्ताबेजहरू, सङ्गठन संरचना र कार्य प्रणालीलाई अद्यावधिक गर्ने उल्लेख छ ।

‘जनसंघर्ष र बलिदानको गर्वपूर्ण इतिहास भएका एवं महत्त्वपूर्ण राजनीतिक परिवर्तनको नेतृत्व गरेका दलहरू सत्ता सञ्चालनमा असफल भएको आधार र कारणहरूको पहिचान गरी उज्यालो नेपाल पार्टीले उपयुक्त तथा परिणाममुखी सङ्गठन संरचना र कार्यप्रणाली अपनाउनेछ’, घोषणापत्रमा भनिएको छ, ‘पार्टी संरचना र पार्टीका सदस्यले पार्टी स्थापनाको घोषणापत्र एवं पार्टीले चुनावमा तयार गर्ने प्रतिवद्धतापत्रहरुको कार्यान्वयन गर्ने साधनको रूपमा कार्य गर्नेछन् ।’

पार्टीको आन्तरिक समस्याहरूलाई हल गर्न सक्ने सङ्गठन संरचना र कार्यप्रणाली अपनाएर लक्ष्य अनुरूप काम गर्नसक्ने बनाउने बताएको सो पार्टीले यसका लागि शक्तिशाली स्थानीय संरचना बनाउने र जनसम्बन्ध बढाउन कार्य गरिने जनाएको छ ।

‘प्रतिस्पर्धीबाट रचनात्मक सहयोग हुने संरचनात्मक व्यवस्था गर्दै पारदर्शिता र आर्थिक अनुशासन निश्चित गरिनेछ’, घोषणापत्रमा भनिएको छ, ‘मत सर्वेक्षण गर्ने, पार्टी सदस्यता नभएका सक्षम, योग्य नागरिकहरू समेतलाई राष्ट्रको लागि योगदान गर्ने अवसर दिइनेछ ।’

निर्वाचनमा उम्मेदवारी छनौटको लागि पारदर्शी मापदण्ड र दोहोरो कार्यसम्पादन मूल्याङ्कनको व्यवस्था गरिने पनि सो पार्टील जनाएको छ । ‘पार्टीका संरचनाहरूमा विषय विज्ञतालाई प्रोत्साहन गर्ने प्रणाली बनाइनेछ । पार्टीलाई जीवन्त बनाउन नेतृत्व विकासको नियन्त्रित र स्वचालित प्रक्रिया अपनाएर पार्टी संरचनामा सक्षम, योग्य र प्रतिस्पर्धी युवालाई अवसर दिने, अग्रजहरूको भूमिका कायम राख्ने निश्चितता गरिनेछ ।’

यसको साथसाथै सङ्गठन निर्माण र विस्तारको क्रममा प्रतिनिधित्वको विषयगत क्षेत्र निर्धारण गरिने घोषणापत्रमा उल्लेख छ ।

पार्टीले समाजका आधारभूत कर्ताहरूको यथार्थ विश्लेषण गर्ने पनि जनाएको छ । ‘उत्पादक उद्यमी ९वस्तु०, व्यापार उद्यमी ९वस्तु तथा सेवा०, निर्माण व्यवसायी, सामाजिक समूहहरू तथा संस्थाहरू, अवकाशप्राप्त खेलाडीहरूरखेल प्रशिक्षकहरू,उद्यमीहरू, मजदुर र निजी क्षेत्रको रोजगारी, स्नातकरस्नातकोत्तररविद्यावारिधि समूहका विद्यार्थीहरू, विभिन्न विश्वविद्यालय र शैक्षिक संस्थामा आबद्ध अध्यापकहरू, अवकाश प्राप्त राष्ट्रसेवकरयोद्धारसहिद परिवार, पूर्वजनप्रतिनिधिरपार्टी संरचनाका पूर्वपदाधिकारीहरू, विषयगत क्षेत्रको विज्ञ, विदेशमा कार्यरत नेपालीहरू लगायत अन्य कर्ताहरूको पहिचान गरी पार्टीको आधारभूत संरचना ९वडा तह० ले आफ्नो अभिलेख व्यवस्थापन गर्नेछ’, सार्वजनिक घोषणापत्रमा भनिएको छ ।

त्यस्ता व्यक्तिलाई वडा तहमा आधारभूत रूपले प्रतिनिधित्व गराउने उज्यालो नेपाल पार्टीको घोषणा छ ।

उमेर र सामुदायिक जनघनत्वको विविधताको आधारमा आफ्नो संरचनामा आरक्षणको व्यवस्था गर्ने जनाएको सो पार्टीले ठुला र धेरै संरचना बनाएर नेता कार्यकर्तालाई बाँध्ने प्रयत्न गर्नुको साटो छरितो, चुस्त र तत्कालै सूचनाको सञ्चार भई चलायमान हुने प्रकारको संरचनाहरू बनाउने दाबी गरेको छ ।

‘यसको लागि विभिन्न तहको अधिवेशन प्रक्रिया, निर्वाचक मण्डल र प्रतिनिधि छनौटको लागि सिर्जनात्मक व्यवस्था गरिनेछ’, घोषणापत्रमा भनिएको छ ।

पार्टीले समसामयिक राष्ट्रिय मुद्दा, वर्गीय एवं सामाजिक उत्पीडन र जनसरोकारको विषयहरूमा सक्रियता निश्चित गर्नेगरी चेतनामूलक, प्रचारमूलक र परिणाममुखी गतिविधिहरू गर्नेमा जोड दिएको छ ।

‘नेपाली जनजीवनको आधारभूत सामाजिक मुद्दाहरूमा जनताहरूको आवाज बोल्ने र र परिणाम दिने भरोसायोग्य राजनीतिक सङ्गठन निर्माण गरिनेछ’, घोषणापत्रमा प्रविधिको अधिकतम प्रयोग गर्ने प्रयत्न गर्दै आफ्नो सङ्गठन संरचनालाई पनि सोही अनुरूप चलायमान बनाउने उल्लेख छ ।

पार्टीले तय गरेको भौगोलिक, गैर–भौगोलिक र समावेशी समूहभित्र वैचारिक, साङ्गठनिक र राजनीतिक एवं जनपरिचालनको क्षेत्र तोकेर उपसमूह पनि बनाउनेछ । ‘यो ३ वटा उपसमूह बनाउने क्रममा वैचारिक कार्यभार सम्पादन गर्न, साङ्गठनिक जिम्मेवारी सम्पादन गर्न र राजनीतिक एवं जनपरिचालनको कार्यभार सम्पादन गर्ने प्रयोजनको लागि योग्यताको न्यूनतम आधारभूत सर्त बाहेकमा मापदण्ड तय गर्ने उल्लेख छ ।रातोपाटीबाट