कैलाली । धनगढी-१४ फूलबारी एचगाउँका नागरिकहरु मोहना नदीमा पक्की पुल नहुँदा काठेपुलको यात्रा गर्न बाध्य भएका छन् ।
भारतीय सुडाबजार आउजाउ गर्न त्यहाँका नागरिकहरु सो स्थानबाट हिउँदमा काठेपुल र बर्षातमा नाउको प्रयोग गरेर यात्रागर्न वाध्यहुनु परेको हो ।
धनगढी-१६ घसिटाका रामसिंह रानाले यो क्षेत्र हुँदै चन्दनचौकी , सुडाबजार लगायतका स्थानमा आफन्तलाई भेट्न जाँदा पक्की पुल नहुदा काठेपुलको यात्रा गर्नु परेको उनले बताए ।
उनले भने ‘बर्षातमा एकदमै अप्ठेरो हुन्छ आउजाउ गर्न, हिउँदमा त काठेपुलबाट मोटरसाइकल, साईकल लगायतका साधन जाने गरेका छौँ ।’
पुल नहुँदा यहाँका मानिस धेरै नै दुख पाईरहेका तथा नेपाल सरकारले यो क्षेत्रमा पुल निर्माण गर्नु पर्ने आफूहरूको माग रहेको उनले बताए ।
‘हामी जस्ता धेरै मानिसहरु यो क्षेत्रबाट नातपात भेट्न जान्छन’ उनले भने ‘नजिकै सुडाबजार भएका कारण पनि किनमेलका लागि यो क्षेत्र बढी प्रयोग हुने गरेको छ ।’
उनले भने ‘यो बर्षौ देखिको समस्या हो । यसैगरी सधै आवतजावत गरिरहेका छौँ ।’
काठेपुलबाट यात्रा गर्ने साईकलयात्रीको ३० र मोटरसाइकल यात्रीको ६० रुपैयाँ तोकिएको धनगढी-१४ फुलवारी एचगाउँका चुनिलाल चौधरीले निशाना न्युजलाई जानकारी दिए ।
न्यु वुद्धयुवा स्पोर्ट क्लवलाई डेढलाख दिने सर्तमा सो पुल संचालन गरिएको उनले बताए ।
काठेपुलको मर्मत सम्भार,पैँसा संकलन फूलबारी एचगाउँका ८ जनाले गर्ने गरेको उनको भनाइ छ ।
दैनिक दुई हजार ५ सयदेखि ४ हजार रुपयाँसम्म संकलन हुने गरेको उनले बताए । बर्षातको समयमा साइकलको ५० र मोटरसाईकलको १५० रुपैया सम्म पनि पर्ने गरेको उनले बताए ।
‘बढीजसो यो क्षेत्रबाट मानिसहरु भारत र नेपाल आउजाउ गर्छन’ उनले भने ‘नजिकै भारतीय बजार र धेरै जसो मानिसहरुका नातपात पनि उतै हुँदा यो क्षेत्र बढी नै प्रयोग भएको पाइन्छ ।’
नेपाल सरकारले पक्कीपुल निर्माण गर्न सकेको भए यहाँका मानिसहरुलाई आवत जावतमा सहज मिल्ने उनको भनाइ छ ।
