धनगढी । बंगुरपालन व्यवसायबाट राम्रो आम्दानी गर्दैछन् धनगढी-१४ फूलबारी एचगाँउकी उर्मिला घले । आर्थिक अवस्थाले निकै गुजुल्टिएको घलेको जीवनलाई बंगुरपालन व्यवसायले एका एक फेरि दिएको हो ।
भनिन्छ नि काम सानो ठूलो हुँदैन कठिन मेहनतले नै छोटो समयमा सफलता तिर पुर्याउँछ यस्तै भएको छ उर्मिला घलेलाई । ९ कक्षासम्म पढाइ गरेकी उनलाई आर्थिक अवस्थाले निकै गुजुल्टेको थियो ।
आर्थिक अवस्थाका कारण उनलाई के गरौँ कसो गरौँ भईरहेको थियो । २०६२ साल बैशाख १२ गते तिरको कुरा हो गरिवी निवारण कार्यक्रम अन्तरगत जिल्ला पशुसेवा कार्यालयको पैँचो कार्यक्रम लागु भइरहेको भन्ने कुरा सुनिन् । ‘सो कार्यक्रम अनुसार तालिममा भाग लिनुपर्छ भनियो त्यो कुरा श्रीमानलाई भने,श्रीमानले जाउ भनेपछि ५० जनाको समूहमा म पनि तालिमका लागि पोखरा गए’ उनले भनिन् ‘तालिमपछि आफ्नै समूह बनाएर पैँचो कार्यक्रम अन्तरगत एक बंगुर पाए ।’
पहिलो बर्षमै बंगुरबाट ८ पाठापाठी भएको र एउटा फिर्ता गरेर ७ वटा आफूसंगै राखेको उनले बताइन् । बंगुरपालन गर्नुपर्छ भन्ने लागेर आफूले बंगुरपालन व्यवसाय सुरु गरेको बताइन् ।
उनीसंग पटकपटक गरी बंगुरबाट १७ पाठापाठी भइसेका थिए । तालिम पछि ग्रामीण पशु स्वास्थ्य कार्यकर्ता भइसकेकी उनी पढाईसंगै बंगुरपालन व्यवसायमा निरन्तर लाग्दै गरेकी छन् ।
उनी बंगुरपालन व्यबसायबाट मात्रै मासिक राम्रो बचत गर्छन् । पढ्दै कमाउदैको सिद्धान्त बाकेकी उनले हाल प्रविणता प्रमाण पत्र तह पास गरी सकेकी छन् । उनले जेटीएको तालिमसंगै पढाई पनि गरेकी छन् । उनले आफ्नो सम्पूर्ण परिश्रम बंगुरपालनमा लगाइरहेकी छन् ।
‘मेहनतमा विश्वास गर्ने हो’ उनले भनिन् ‘बंगुरपालनबाट मात्रै विभिन्न स्थानमा १५ कठ्ठा जमिन खरिद गरिसकेकी छु ।’
विगतमा ५ जनाको परिवार पालनपोषण गर्न धौधौ हुने गरेकोमा अहिले एक छोरा दुई छोरीलाई बोडिङ्ग स्कुल पढाइरहेकी र श्रीमानको खर्च पनि यहीबाट धानिरहेको उनी सुनाउँछन् । अहिले घरमै किराना पसल,उर्मिला एग्रोभेट र वंगुरफर्मसंगै संचालन गरिरहेको उनले बताइन् ।
उनले भनिन् ‘अहिले फुर्सद नै हुन्न । जेटीए पनि पढाई गरेका कारण गाउँलेले पशु बिरामी हुँदा बोलाउँछन् ।’ गाँउमा बिरामी पशु हेर्ने,उपचार गर्ने उनको दिनचर्या जस्तै भएको छ ।
भैँसीपालनमा पनि सकृय
यती मात्र होइन उनले १६ जना महिलाको समूह निर्माण गरेर भैँसीपालन व्यवसायमा पनि सकृय भएकी छन् । उनीसंग दुई वटा उन्नत जातका भैंसी छन् । एउटा अनुदानमा पाएको र अर्को आफैले किनेको उन्नत जातको भैँसी छ । उनले दैनिक १० लिटर दूध बिक्री गर्छिन् ।
भैँसीकै दूध बेचेर उनको मासिक आम्दानी झण्डै रु २० हजार हुन्छ । विगतमा गृहणीकारुपमा सीमित उर्मिला घरमा आवश्यक दूधकै लागि भैँसीपालन गरेकी छिन् ।
उनले फूलबारी एचगाँउका १६ जना महिलाहरु खोजेर सिदार्थ महिला कृषि समूह गठन गरी दर्ता गरेकी हुन् । ग्रामीण उद्यम तथा आर्थिक विकास आयोजना,आर्थिक कोरिडोर डडेल्धुराको अनुदानमा १६ जना महिलालाई समूहमार्फत भैँसीपालनका लागि सहयोग गरिएको हो ।
‘एक भैँसी पालेर घाँस खेती समेत गरेकी छु’, उनी भन्छिन् ‘ भैँसीको साँझ बिहानको दैनिक १० लिटर दूध बिक्री हुन्छ । मेरो घर राम्रै चलेको छ ।’ उनी मेहनत र परिश्रम गरे सफलता र सन्तुष्टि दुवै प्राप्त हुने बताउँछिन् ।
सो अनुदान मार्फत १५ भैंसी र एक राँगाबाट व्यवसाय सुरु गरेर यहाँका महिलाहरु आत्मनिर्भर भएको उनले बताइन् ।
‘अहिले आर्थिक अभावको महसुस हुँदैन’ उनले भनिन् ‘विगतको पाठ सिकेर मेहनत गरिरहेकी छु पैँसा के हो ? महत्व के हुन्छ ? भन्ने कुरा आफूलाई राम्रैसंग थाहा भएको छ ।’
