धनगढी । कैलालीको धनगढीमा सोमबारबाट सुरु भएको ‘सुदूरपश्चिम महोत्सव–२०८२’ जारी छ । कैलाली उद्योग वाणिज्य संघद्वारा आयोजित महोत्सवमा हरेक वर्ष झै यस वर्ष पनि ‘थारु कला प्रदर्शनी घर’ राखिएको छ ।
थारु कला प्रदर्शनी घरमा थारु परिकार पाइनुका साथै थारु संस्कृतिका विभिन्न गीत नृत्य प्रस्तुति गर्ने गरिएको प्रदर्शनी घरका सञ्चालक बलीचरण चौधरीले बताए । उनले भने ‘यहाँ आउने दर्शकले थारु संस्कृतिका गीत सुन्न,नाच हेर्न पाउनेछन् ।’
उनले भने ‘हामी पछिल्लो समय लोप हुँदै गएको थारु संस्कृति,खानपानलाई जर्गेना गर्ने उदेश्यले यो सञ्चालनमा ल्याएका हो । यहाँ सम्पूर्ण थारु परिकारहरु पाइन्छन ।’ थारुको पहिचानका लागि थारु कला प्रदर्शनी घर राखिएको उनले बताए ।
उनले भने ‘यस भित्र राखिएका स्टलहरुमा घोँगी,मुसाको चटनी,झिँगामाछा,बंगुरको मासु,स्थानीय कुखुराको मासु,ढिक्रीलगायतका सबै थारु परिकार छन् ।’
प्रदर्शनी घरमा थारु संग्राहालय समेत राखिएको छ । जहाँ थारु संस्कृति झल्किने भेषभुषालगायत राखिएका छन् । प्रदर्शनी घरमा विभिन्न ३० वटा स्टल रहेको उनले बताए । उनले थारु कला प्रदर्शनी घरबाट करिब १५ लाख बराबरको आम्दानी हुने अनुमान गरिएको उनले बताए ।
प्रदर्शनी घरमा होटल सञ्चालन गरिरहेका निर्मल चौधरीले आफूले विभिन्न थारु परिकार बनाएर बिक्री गरिरहेको बताए । उनले भने ‘आलुका परिकार,घोँगी,गँगटा ,झिँगामाछा,बंगुरको मासु,बंगुरको सुकुटी,स्थानीय कुखुराको मासु,ढिक्री लगायतका परिकार बनाउने गरेका छौँ । थारु परिकार मनपराउनेहरु खान आउनुहुन्छ ।’
महोत्सव अवधिभर थारु परिकार बिक्रीबाट राम्रै आम्दानी हुने उनको विश्वास छ । महोत्सव आगामी पुस २ गतेसम्म सञ्चालन हुने कैलाली उद्योग वाणिज्य संघले जनाएको छ ।
