धनगढी । हाम्रो पार्टी नेपालका सभापति खगेन्द्र सुनारले नेपाली कांग्रेस र नेकपा (एमाले)का कारण देशमा अहिलेको अवस्था आएको बताएका छन् ।
सो पार्टीले बुधबार धनगढीमा आयोजना गरेको पत्रकार सम्मेलनमा बोल्दै उनले देशका दुई ठूला दलले अहिलेको अवस्था सिर्जना गरेको बताए ।
उनले भने ‘सामाजिक सञ्जालमाथिको प्रतिबन्ध फुकुवा गर्नुपर्छ भनेर गएका जेनजी युवाहरुलाई तत्कालीन सरकारले ताकीताकी गोली हान्ने काम ग¥यो । जसका कारण देशमा अहिलेको अवस्था सिर्जना भयो । जेनजी विद्रोह भएको हो ।’
उनले भने ‘विपरीत ध्रुवका शक्तिहरु कांग्रेस र एमाले आफ्नो स्वार्थ र शक्तिका लागि एक ठाउँमा उभिएर अर्काले बनाइदिएको फेसबुक,टिकटक तथा नेटमा राजनीति गर्ने काम गरे यो इतिहासले माफ गर्ने कुरा छैन् ।’
उनले भने ‘कांग्रेस र एमालेको तत्कालीन सरकारले संविधानमा लेखेको कुरा हुवह कार्यान्वयन गरेको भए अहिलेको यो परिस्थिति आउने थिएन् । जग्गा नहुनेलाई जग्गा दिने,घर नहुनेलाई घर दिने,शिक्षा नभएकालाई शिक्षा दिने,उपेक्षित वर्गलाई राज्यको मूलधारमा ल्याउने कुरा संविधानले स्पष्ट भनेको छ ।’
कांग्रेस र एमालेको तानाशाही प्रवृतिबाट देशलाई बाहिर ल्याउन जरुरी रहेको उनले बताए ।
उनले देशलाई सही दिशा निर्देश गर्नुपर्छ भन्ने उदेश्यले हाम्रो पार्टी नेपालको स्थापना गरेको बताउँदै देश संकटको अवस्थामा गुज्रिरहेको बेला केही परिवर्तन गर्ने उदेश्यले पार्टी निर्माण गरेको बताए ।
सामाजिकरुपमा पीडा,हिंसामा परेका,राज्यको मूलधारभन्दा पछाडि परेकाको बिषय राज्यको छलफलको बिषय बनाउनुपर्छ भन्ने उदेश्यले आफ्नो पार्टी निर्माण भएको बताए ।
जनताको विद्रोहबाट सिर्जना भएको परिस्थितिलाई सही दिशामा लैजान सबै वैकल्पिक शक्ति एक हुनुपर्ने उनले बताए ।
