धनगढी । सुदूरपश्चिममा आज भुवा पर्व मनाइँदै छ । सुदूरपश्चिमका पहाडी जिल्लाहरू बाजुरा, डोटी, अछाम, बझाङ लगायतका क्षेत्रमा आ–आफ्नै संस्कार र परम्परा अनुसार भूवापर्व मनाउँदै आइएको छ।

पछिल्ला वर्षहरूमा पहाडबाट तराईका जिल्लाहरुमा बसाई सरेका समुदायहरूले पनि निरन्तर रूपमा यो पर्व मनाउँदै आएका छन् । पछिल्लो समय भुवा पर्व कैलाली, कञ्चनपुरमा पनि मनाउन थालिएको छ । भुवा पर्वको अवसर पारेर बाजुरेली सेवा समाज धनगढीले पुस ४ (आज) देखि ६ गतेसम्म धनगढीस्थित रंगशालामा भुवा पर्व महोत्सव तथा भुवाचाली खेल प्रतियोगिता पनि आयोजना गरेको छ ।

पौराणिककालमा कौरवमाथि पाण्डवले विजय प्राप्त गरेको दिनको सम्झनाका रुपमा यो पर्व मनाउने गरिन्छ । असत्यमाथि सत्यको विजयको खुसीयालीस्वरूप सो युद्धमा प्रयोग गरिएका ढाल र तरवार नचाई खेलिने खेल नै आजको भुवाचाली खेलको रूपमा विकास भएको ऐतिहासिक मान्यता रहेको जानकारहरु बताउँछन् ।

भुवा पर्वको अवसरमा प्रदेश सरकारले आज प्रदेशभरी सार्वजनिक बिदा दिएको छ । बिदाको दिन प्रदेश स्थित सरकारी तथा सार्वजनिक निकायहरु बन्द रहने जनाएको छ ।