धनगढी । सुदूरपश्चिम प्रदेश प्रहरी कार्यालय धनगढीका प्रमुख एवं प्रहरी नायव महानिरीक्षक (डिआईजी) ओमबहादुर रानाले प्रदेशमा शान्ति सुरक्षालाई मजबुद बनाउन कुनै कसुर बाँकी नराख्ने बताएका छन् । आज पत्रकार भेटघाटको कार्यक्रममा बोल्दै उनले सो कुरा बताएका हुन् ।
सुदूरपश्चिम प्रदेशमा बढ्दो लागुऔषध करोबारलाई न्युनीकरणका लागि सक्दो काम कारबाही अघि बढाइ सकेको उनले बताए । लागुपदार्थ ओसार पसार र कारोबारलाइ कसरी न्युनीकरण गर्न सकिन्छ भनेर केही दिन भित्र स्टेक होल्डर र नागरिकसँग वृहत छलफल गरेर कार्ययोजना बनाएर अघि बढ्ने उनले बताए ।
आत्महत्या एउटा डिप्रेसनका कारणले नै हुने गरेको र यो एउटा रोग पनि भएकाले सत्यतथ्य पत्ता लगाई रोकथामका लागि प्रहरी लागिरहेको उनको भनाइ छ । ‘जेनजी आन्दोलन पछिको परिस्थितिले प्रहरीको मनोबल कमजोर भएको होकी भन्ने लाग्छ’ उनले भने ‘कानुन अनुसार काम गर्ने प्रहरीहरुको जिम्मा कार्यालय प्रमुखले लिन्छ ।’
जेनजी आन्दोलनका क्रममा भोगेका कैदीबन्दी मध्ये अझै ३६५ जना फरार रहेको उनले बताए । भागेका मध्ये ६५ जना भारतीय रहेको उनले बताए । उनले भने ‘धेरै कैदीबन्दी भारत भागेको भन्ने छ । सबैको निगरानी भइरहेको छ ।’ प्रहरी नागरिकलाई शान्ति सुरक्षाको प्रत्याभूति दिलाउन कटिबद्ध रहेको उनले बताए ।
त्यसैगरी प्रदेश प्रहरी कार्यालयका प्रहरी उपरीक्षक गौतम मिश्रले कार्यालय मंसिर महिनामा सम्पादन गरेका कामका बारेमा जानकारी दिएका थिए ।
उनले मंसिर महिनामा १२० सवारी दुर्घटना हुँदा १० जनाको मृत्यु भएको र २१४ जना घाइते भएको बताए । दुर्घटनामा १८० सवारी साधान संलग्न भएको उनले बताए ।
उनले भने ‘बढी जस्तो दुर्घटना चालकको लापरबाहीले भएको देखिएको छ । यान्त्रिक कारणले पनि दुर्घटना हुने गरेका छन ।’ त्यस्तै, एक महिनामा ट्राफिक नियम उल्लंघन गर्ने ३ हजार २८० सवारी साधान कारबाहीमा परेको र कारबाहीबाट २६ लाख २४ हजार ५ सय राजस्व संकलन भएको उनले बताए ।
त्यसैगरी सो अवधिमा ११ नाल भरुवा बन्दुक बरामद गरिएको,दुई वटा मुद्धा दर्ता भएको र दुई जनालाई पक्राउ गरिएको उनले बताए । त्यस्तै,९५ लाख ७५ हजार ९८५ मूल्य बराबरका भन्सार छलीका सामान बरामद गरि आवश्यक कारबाहीका लागि सम्बन्धित निकायमा पठाइएको उनले बताए ।
