कैलाली । स्वास्थ्य कार्यालय कैलालीले स्थानीय तहका विभिन्न स्थानमा स्वास्थ्य परिक्षण स्वास्थ्य सचेतना तथा परामर्शका कार्यक्रम गर्न थालेको छ । भजनी नगरपालिका ४ धनौरा मा सोमबार ११२ जना र मंगलबार धनगढी उपमहानगरपालिकाको डमैलीयामा १११ जनामा स्वास्थ्य परिक्षण गरेको छ ।
सो क्षेत्रमा नसर्ने रोग निदानका लागि स्वास्थ्य परीक्षण भन्ने मूल नाराका साथ स्थानीय तह स्वास्थ्य शाखाहरुको समन्वयमा स्वास्थ्य परीक्षण स्वास्थ्य सचेतना तथा परामर्श कार्यक्रम सम्पन्न गरेको हो।
स्वास्थ्य कार्यालय कैलालीले नसर्ने रोग मुख्य स्वास्थ्य समस्याका रुपमा देखा पर्दै गएकाले आमनागरिकको जीनवशैली, खानपान र रहनसहनमा सचेत हुनु पर्ने जनाएको छ ।
पछिल्लो समय नसर्ने रोगले आमसमुदाय ग्रस्त बन्दै गएको र अझै दैनिक गुजारा गरेर जीविकोपार्जन गर्ने समुदाय बढी प्रकोपमा पर्ने भएकाले यो कार्यक्रम सञ्चालनमा ल्याएको स्वास्थ्य कार्यालय कैलालीका प्रवक्ता एवं सूचना अधिकारी मिनबहादुर धामीले बताए।
उनले नसर्ने रोग सरुवा रोगभन्दा भयानक बन्दै गएको बताए । यस सम्बन्धमा सचेतना फैलाउन निकै आवश्यक रहेको हुँदा सुदूरपश्चिम सरकारको प्राथमिकतामा रहेको स्वास्थ्य सेवाको पहुँचलाई आम नागरिक समक्ष पुर्याउने उदेश्यका साथ मंगलबार करिब २सय भन्दा बढी विद्युतीय रिक्सा चालकलाई स्वास्थ्य परीक्षण स्वास्थ्य सचेतना तथा परामर्श कार्यक्रम अन्र्तरगत उच्चरक्तचाप, सुगर, तौल,उचाई, आवश्यकता अनुसार औषधीहरु प्रदान गरेको उनले बताए ।
चालक मजदुरहरुले स्वास्थ्य कार्यालय कैलालीद्वारा सञ्चालित यो कार्यक्रम आफ्ना लागि निकै फलदायक रहेको भन्दै धन्यवाद समेत दिएका थिए।
नसर्ने रोगको जोखिम तत्वबारे अनुसन्धान
नेपालमा नसर्ने रोगको जोखिम तत्वबारे अनुसन्धान थालिएको छ । नेपाल स्टेप्स सर्वेक्षण २०१९ को नतिजा अनुसार, अहिले सुदूर पश्चिम प्रदेशमा एकसयमा करिब २१ जनालाई उच्च रक्तचाप, सयमा ४ जनालाई मधुमेह र त्यस्तै सयमा मा ३३ जना सुर्तीजन्य पदार्थको सेवन र सयमा १८ जनाले धुम्रपान र सयमा ७ जनाले अत्याधिक मदिरा सेवन गरिरहेको तथ्याङ्कमा उल्लेख छ ।
पछिल्लो समय सुदूरपश्चिम प्रदेशमा नसर्ने रोगको जोखिम बढ्दै गएको स्वास्थ्य कार्यालय कैलालीले जनाएको छ । । नसर्ने रोगलाई निराकरण गर्न प्रदेश सरकार र आम जनसमुदाय पनि उत्तिकै जिम्मेवार हुन जरुरी देखिन्छ ।
