धनगढी । सुदूरपश्चिम प्रदेशका सामाजिक विकास राज्यमन्त्री सरस्वती खड्काले भारतमा रोजगारीमा जाने नेपालीको एकिन तथ्यांक लिन आवश्यक भएको बताएकी छन् ।
सामाजिक विकास मन्त्रालय र अन्तर्राराष्ट्रिय श्रम संगठन नेपालले मंगलबार धनगढीमा आयोजना गरेको राष्ट्रिय श्रम आप्रवाशन नीति २०८२ को प्रदेश तथा स्थानीय तहमा कार्यान्वयन बिषयक सरोकारवाला परामर्श कार्यक्रममा बोल्दै उनले यस्तो बताएकी हुन् ।
उनले सुदूरपश्चिम प्रदेशबाट ठूलो संख्यामा रोजगारीका लागि भारत जाने नागरिक भएपनि एकिन तथ्यांक नहुँदा उनीहरुका समस्या पहिचान,समाधान लगायतमा समस्या हुने गरेको बताइन् ।
उनले भनिन् ‘हामीले तथ्यांक लिनका लागि बजेट पनि विनियोजन गरेका थियौँ । तर, कार्यान्वयन भएन् । भारतमा रोजगारीका लागि जाने महिला,विपन्न नागरिक,बालबालिकाको सुरक्षाका लागि पहल गर्न आवश्यक छ ।’
उनले यसबारे सरकारले स्पष्ट नीति बनाएर कार्यान्वयन गर्नुपर्नेमा पनि जोड दिइन् । कार्यक्रममा अन्तर्राष्ट्रिय श्रम संगठन नेपालका वरिष्ठ कार्यक्रम अधिकृत बसन्तकुमार कार्कीले भारतमा जाने नेपाली कामदारहरुको सन्दर्भमा राष्ट्रिय श्रम आप्रवाशन नीतिका २०८२ का बारेमा प्रस्तुतिकरण राखेका थिए ।
उनले १३ प्रतिशत नेपाली नागरिक भारतमा निर्भर रहेको तथ्यांक प्रस्तुत गरे । उनले भारतको रोजगारी नेपाली गरिब जनताका लागि सुरक्षा कवज,सास धान्ने आधार भएको बताए ।
उनले नेपालीका लागि भारतमा रोजगारीको सम्भावना भएको बताउँदै प्रदेश तथा स्थानीय सरकारले उनीहरुलाई सामाजिक सुरक्षामा आवद्ध गर्नुपर्नेमा जोड दिए ।
कार्यक्रममा सुरक्षित आप्रवाशन परियोजना (सामी)का प्रदेश कार्यालय व्यवस्थापक पञ्चराम चौधरीले परियोजनाले गरेको भारगामी नेपाली कामदार लक्षित पहलका बारेमा प्रस्तुतिकरण राखेका थिए । उनले भारतगामी नेपाली कामदारलाई जाने क्रममा,काम गर्ने क्रममा र आउने क्रममा थुप्रै समस्या रहको बताए ।
सामाजिक विकास मन्त्रालयका जनकराज भट्टले सुदूरपश्चिम प्रदेश सरकारले भारतगामी नेपाली कामदारका मुद्दा सम्बोधन गर्न सञ्चालन गरेका कार्यक्रम तथा पहलका बारेमा जानकारी दिएका थिए ।
उनले प्रदेश सरकारले विभिन्न व्यावसायिक सीपमूलक तालिम,सशक्तीकरण तालिम सञ्चानल गर्दै आएको बताए । उनले आगमी दिनमा प्रदेश सरकारको बैदेशिक रोजगार सूचना केन्द्र,हेल्प डेस्कको स्थापना गर्ने योजना रहेको बताए । कार्यक्रममा सरोकारवाला विभिन्न संघ संस्थाका प्रतिनिधिहरुको सहभागिता रहेको थियो ।
