बाजुरा- बाजुरामा अटोबाट खसेर एक जनाको मृत्यु भएको छ । जिल्लाको साँफे– मार्तडी सडकअन्तर्गत पर्ने द्वारी खोल्सामा अटोबाट खस्दा बुढीगङ्गा नगरपालिका–२ बजेडीका ४० वर्षीय मोती विकको मृत्यु भएको हो ।
मार्तडीबाट बल्दे आउँदै गरेको सुप्रप ०१००१ ह ४०६३ नम्बरको अटोबाट खसेर घाइते भएका विकको उपचारका लागि जिल्ला अस्पताल बाजुरामा ल्याउँदै गर्दा बाटैमा मृत्यु भएको जिल्ला प्रहरी कार्यालय बाजुराले जनाएको छ ।
चाकल नरजन बुढालाई नियन्त्रणमा लिइए थप अनुसन्धान अगाडि बढाइएको जिल्ला प्रहरी कार्यालय बाजुराका सूचना अधिकारी गिन्द्रबहादुर बोगटी बताए । उनका अनुसार अटोमा सवार अन्य यात्रु र अटो चालक सकुशल छन् ।
साँफे–मार्तडी सडक राजमार्गमा अटो सञ्चालन भएको भण्डै पाँच वर्ष भयो । गत २०७८ मा पनि साँफे–मार्तडी सडक राजमार्गमाअन्तर्गत सुवाखाँदमा अटो खस्दा दुई जनाको मृत्यु र तीन जना घाइते भएका थिए ।
