धनगढी । कैलालीको धनगढी उपमहानगरपालिकाले आगामी आर्थिक वर्ष २०८३/८४ का लागि रु २ अर्ब ६४ करोड ६४ लाख ६४ हजार ४६४ को बजेट सार्वजनिक गरेको छ।
आइतबार बसेको नगरसभाको १५औँ अधिवेशनमा उपप्रमुख कन्दकलाकुमारी रानाले आगामी आवको बजेट प्रस्तुत गरेकी हुन् । उनले चालुतर्फ रु १ अर्ब ४३ करोड ६३ लाख ८७ हजार ७८१ र पुँजीगततर्फ रु १ अर्ब २३ करोड ७६ लाख ६८३ विनियोजन गरिएको जानकारी दिइन्।
बजेटका स्रोतहरूमा आन्तरिक आयबाट रु ५५ करोड १० लाख, राजस्व बाँडफाँडबाट रु ६० करोड ४५ लाख ३६ हजार २०६, नेपाल सरकारबाट वित्तीय हस्तान्तरणमार्फत रु १ अर्ब ६ करोड ७९ लाख ७ हजार, प्रदेश सरकारबाट रु १४ करोड २२ लाख ७ हजार तथा चालु आर्थिक वर्षको बचतबाट रु ४२ करोड ३० लाख २१ हजार २४८ प्राप्त हुने अनुमान गरिएको छ।
आर्थिक वर्ष २०८१/८२ मा विनियोजित २ अर्ब १६ करोड २९ लाखमध्ये १ अर्ब ६४ करोड ३५ लाख ८४ हजार खर्च भएको उपप्रमुख रानाले बताइन् । चालु आर्थिक वर्ष २०८२/८३ मा अनुमानित रु २ अर्ब ५६ करोड ४ लाख ६६ हजार बजेटमध्ये जेठ मसान्तसम्म रु १ अर्ब ७७ करोड ४९ लाख ५१ हजार १४३ प्राप्त भई रु १ अर्ब १९ करोड ९४ लाख ६५ हजार ७४२ खर्च भएको उनले बताइन्।
आगामी बजेटमा उपमहानगरले शिक्षा, स्वास्थ्य,पूर्वाधार विकास,पर्यटन प्रवर्द्धनलगायतलाई प्राथमिकता दिइएको छ।
