धनगढी । कृषि ज्ञान केन्द्र कैलालीले पनि ‘२३औं राष्ट्रिय धान दिवस तथा रोपाइँ महोत्सव–२०८३’ मनाएको छ ।
आज सो अवसरका कैलारी गाउँपालिका–७ बसन्तामा एक कार्यक्रमको आयोजना गर्दै धान दिवस मनाएको हो ।
कार्यक्रममा बोल्दै जिल्ला समन्वय समिति कैलालीका प्रमुख टीकाकुमारी चौधरीले पहिले धान छरेर उत्पादन गर्ने परम्परा रहेको बताउँदै अहिले समय परिवर्तन हुँदै जाँदा हातले रोप्ने हुँदै मेसिनले रोप्ने समय आइकेको बताइन् । धान रोप्ने प्रविधिमा भएको विकासले उत्पादनमा पनि फरक हुँदै गएको उनले बताइन् ।
त्यस्तै,कैलारी गाउँपालिकाका अध्यक्ष राजसमझ चौधरीले संघ,प्रदेश तथा स्थानीय सरकारले किसानलाई खासै सम्बोधन गर्न नसकेको बताए । उनले पालिकाले किसानका लागि विभिन्न कार्यक्रम गर्दै आएको बताए । उनले पालिकाले किसानलाई विभिन्न किसिमका साना यन्त्र उपकरण दिँदै आएको पनि बताए ।
कार्यक्रममा बोल्दै भूमि व्यवस्था,कृषि तथा सहकारी मन्त्रालयका सचिव शंकर शाहले नेपालका ६० प्रतिशत र सुदूरपश्चिममका ८४ प्रतिशत जनता कृषिमा आवद्ध रहेको बताए ।
कृषि अर्थतन्त्र,सामाजिक विकास,जीविकोपार्जन,खाद्य सुरक्षाका लागि प्रमुख आधारका रुपमा रहेको बताए । उनले कृषि सही दिशामा नगए कुनै पनि चिज अगाडि बढ्न नसक्ने बताए ।
कृषि ज्ञान केन्द्र प्रमुख घनश्याम चौधरीले मनसुन सुरु हुनु अगाबै धान रोप्दा सिचाइमा लागत बढी लाग्ने भएकाले मनसुनसँगै धान रोप्नु पर्ने बताए । उनले त्यस्तो गर्दा सिचाइको लागत घट्ने बताए ।
कार्यक्रममा बोल्दै कृषि ज्ञान केन्द्रका वरिष्ठ कृषि प्रसार अधिकृत टेकबहादुर बिष्टले जन्मेदेखि मृत्युसम्म विभिन्न संस्कारमा धानको महत्व रहेको बताए । उनले धान नेपालको संस्कृति समेत भएको बताए ।
उनले पछिल्लो समय कृषिमा हुँदै गएको प्रविधिको विकाससँगै धानको उत्पादकत्व पनि बढ्दै गएको उनले बताए ।कार्यक्रममा सो क्षेत्रमा जनप्रतिनिध,कर्मचारी तथा स्थानीयले खेतमा धानसमेत रोपेका थिए ।
तीन जना कृषक पुरस्कृत
सोही कार्यक्रममा ज्ञान केन्द्रले तीन जना कृषकलाई ‘भीमदत्त उत्कृष्ट कृषक पुरस्कार–२०८३’बाट पुरस्कृत गरेको छ ।
घोडाघोडी नगरपालिका–२ का माछापालक कृषक मनोज खनाल,घोडाघोडी नगरपालिका–८ का तरकारीखेती गर्ने धनबहादुर चौधरी र चुरे गाउँपालिका–१ का फलफूल खेती गर्ने रीताकुमारी देउवालाई पुरस्कृत गरिएको हो ।
उनीहरुलाई जनही नगद २५ हजार,प्रमाण पत्र र दोसल्ला ओढाएर सम्मान गरिएको थियो । उनीहरुलाई जिल्ला समन्वय समिति कैलालीका प्रमुख टीकाकुमारी चौधरीले नगदसहित प्रमाणपत्र हस्तान्तरण गरेकी थिइन् ।
