धनगढी । कैलालीको धनगढी उपमहानगरपालिकाले सामुदायिक विद्यालयलाई लक्षित गर्दै ‘एकीकृत भान्साघर’ सञ्चालनमा ल्याएको छ ।
सामुदायिक विद्यालयका बालबालिकालाई गुणस्तरीय तथा पोषणयुक्त दिवा खाजा उपलब्ध गराउने उद्देश्यले ‘एकीकृत भान्साघार’ सञ्चालनमा ल्याइएको हो ।

धनगढी उपमहानगरपालिका–७ तिल्केचोकमा निर्माण गरिएको एकीकृत भान्साघरको शनिबार एक कार्यक्रमकाबीच वडा नम्बर ७ का वडाअध्यक्ष मोति रानाथारूले उद्घाटन गरे ।

आगामी साउन १ गतेदेखि वडा नम्बर १ देखि ८ सम्मका २१ सामुदायिक विद्यालयका विद्यार्थीलाई सो भान्साघरमा तयार गरिएको खाजा वितरण ग

उपमहानगरकाअनुसार ११ वटा आधारभूत र १० वटा माध्यमिक विद्यालयमा बालविकासदेखि कक्षा ५ सम्म अध्ययनरत ३ हजार ७९५ जना विद्यार्थीले नियमित रूपमा दिवा खाजा प्राप्त गर्नेछन् । वडा नम्बर १ स्थित सरस्वती आधारभूत विद्यालयमा भने कक्षा ८ सम्म अध्ययनरत सबै विद्यार्थीलाई सोही भान्साघरबाट खाजा उपलब्ध गराइने जनाइएको छ ।

उपमहानगरपालिकाले ‘फुड फर लाइफ’ संस्थासँगको सहकार्य, विश्व खाद्य कार्यक्रम र नेपाल सरकारको सहयोगमा रु दुई करोड ४५ लाख ३३ हजार २९ लागतमा भान्साघर सञ्चालनमा ल्याएको जनाएको छ ।

भान्साघरको पूर्वाधार निर्माणमा रु ६८ लाख ३२ हजार ८५०, भान्सा सामग्री खरिदमा रु १७ लाख ४७ हजार ३९९, खाजा ढुवानीका लागि सवारी साधन खरिदमा रु ३७ लाख ७७ हजार ९९८ तथा विन्डो जडान र ट्रान्सफर्मर खरिदमा रु १३ लाख ९२ हजार ४४५ खर्च गरिएको नगर प्रमुख गोपाल हमालले जानकारी दिए । साथै विश्व खाद्य कार्यक्रमबाट करिब रु ८६ लाख रुपैयाँ बराबरका सामग्री सहयोग प्राप्त भएको उनले जानकारी दिए ।

उपमहानगरले ‘एकीकृत भान्साघर’ कार्यक्रम आगामी वर्षमा पालिकाभित्रका सबै सामुदायिक विद्यालयमा विस्तार गर्ने जनाएको छ ।