धनगढी । बझाङमा जिप दुर्घटना हुँदा ३ जनाको मृत्यु भएको छ भने १३ जना घाइते भएका छन ।
जिल्लाको केदारस्यु गाउँपालिका-७ सुगरे स्थित भित्री सडक खण्डमा बिजगडा देखि सुगरे दुर्गाथली तर्फ जादै गरेको सु.प.प्र.०१-००१ च २६४४ नम्बरको जिप अनियन्त्रित भइ शनिबार दिउँसो दुर्घटना भएको प्रहरीले जनाएको छ ।
जिप दुर्घटनामा परि केदारस्यु गाउँपालिका-७ काडाचौर बस्ने ३५ वर्षीया बिमला धामी,दुर्गाथली गाउँपालिका-६ चुहावन बस्ने ६० वर्षीया केलादेवी महत र सोही ठाउँ बस्ने ६० वर्षीय चक्र महतको घटनास्थलमै मृत्युु भएको सुदूरपश्चिम प्रदेश प्रहरी कार्यालयले जनाएको छ ।
उक्त जिपमा चालक सहित १६ जना सवार रहेको प्रहरीले जनाएको छ । घाइते भएका १३ जनामध्ये १२ जनाको जिल्ला अस्पताल बझाङमा उपचार भइरहेको र १ जना घाइते डिस्चार्ज भईसकेका प्रहरीले जनाएको छ । दुर्घटना सम्बन्धमा प्रहरीले आवश्यक अनुसन्धान गरिरहेको जनाएको छ ।
