धनगढी । डडेल्धुराको अमरगढी नगरपालिका–७ खस्रेखानमा शनिबार बिहान बोलेरो जिप दुर्घटना हुँदा दुई जनाको घटनास्थलमै मृत्यु भएको छ भने तीन जना घाइते भएका छन् ।
धनगढीबाट दार्चुलातर्फ जाँदै गरेको सु.प.प्र.०१–००१ ज १८५० नम्बरको बोलेरो शनिबार बिहान करिब ३ :३० बजे अनियन्त्रित भई सडकबाट ३००–४०० मिटर तल खसेको सशस्त्र प्रहरी बल नं. ५२ गुल्म डडेल्धुराले जनाएको छ ।
दुर्घटनामा दार्चुलाको अपिहिमाल गाउँपालिका–१ का ४५ वर्षीय शुगन लोथ्याल र २८ वर्षीया हनु लोथ्यालको घटनास्थलमै मृत्यु भएको छ ।
घाइते हुनेमा चालक बैतडीको डिलाशैनी गाउँपालिका–२ का २० वर्षीय अमृत घरेडी, दार्चुलाको मार्मा गाउँपालिका–३ का ५० वर्षीय अम्मर सिंह ठगुन्ना र अपिहिमाल गाउँपालिका–१ की ३५ वर्षीया सरस्वती लोथ्याल रहेका छन् ।
चालकको अवस्था सामान्य रहेको तथा अन्य दुई जनाको टाउको, छाती र शरीरका विभिन्न भागमा मध्यम चोट लागेको प्रहरीले जनाएको छ । उनीहरूको डडेल्धुरा अस्पतालमा उपचार भइरहेको छ ।
