धनगढी । कैलालीमा यस वर्ष चैते धान उत्पादनमा वृद्धि भएको छ । गत वर्षको तुलनामा यस वर्ष एक हजार ५० मेट्रिकटनले वृद्धि भएको जिल्लास्थित कृषि ज्ञान केन्द्रले जनाएको छ ।
गत वर्ष जिल्लामा पाँच हजार दुई सय ५० मेट्रिकटन चैते धान उत्पादन भएकामा यस वर्ष छ हजार तीन सय मेट्रिकटन उत्पादन भएको कृषि ज्ञान केन्द्रका सूचना अधिकारी टेकबहादुर बिष्टले जानकारी दिए ।
गत वर्षको तुलनामा यस वर्ष चैते धानखेतीको क्षेत्रफल बढेकाले उत्पादन बढेको उनले बताए । सूचना अधिकारी बिष्टका अनुसार जिल्लामा गत वर्ष एक हजार पाँच सय हेक्टर जग्गामा चैते धानखेती गरिएकामा यस वर्ष एक हजार आठ सय हेक्टरमा खेती गरिएको थियो ।
उनले चैते धानको उत्पादकत्व भने नबढेको बताउँदै चैते धानको उत्पादकत्व यस वर्ष पनि ३ दशमलव ५ मेट्रिकटन प्रतिहेक्टर रहेको जानकारी दिए ।
उनले जिल्लाका भजनी,टीकापुर नगरपालिका,कैलारी,जोशीपुर तथा जानकी गाउँपालिका लगायत जिल्लाका अति डुबान प्रभावित हुने अन्य क्षेत्रका किसानले चैत धानखेती गर्दै आएका बताए ।
ज्ञान केन्द्रले चैते धानखेतीका लागि किसानलाई ५० प्रतिशत अनुदानमा यन्त्र उपकरण, बीउ, विषादीलगायत आवश्यक सामग्री उपलब्ध गराउँदै आएको सूचना अधिकारी बिष्टले जानकारी दिए ।
