धनगढी । कैलाली भन्सार कार्यालयले लक्ष्यअनुसारको राजस्व संकलन गर्न सकेको छैन् । कार्यालयले गत आर्थिक वर्ष २०८२/८३ लक्ष्यअनुसारको राजस्व संकलन गर्न नसकेको हो ।
गत आर्थिक वर्षमा रु ९ अर्ब ७१ करोड १५ लाख राजस्व सङ्कलन गर्ने वार्षिक लक्ष्य रहेकामा रु आठ अर्ब ३९ करोड ८५ लाखमात्रै राजस्व संकलन भएको कैलाली भन्सार कार्यालयले जनाएको छ । जुन वार्षिक लक्ष्यको ८६ दशमलव ४८ रहेको कार्यालयले जनाएको छ ।
कार्यालयले गत आवमा भन्सार महसुलतर्फ रु २ अर्ब ८५ करोड ५८ लाख,मूल्य अभिवृद्धि करतर्फ रु ३ अर्ब ६६ करोड ९३ लाख,अन्तःशुल्कतर्फ रु १४ करोड ९३ लाख र अन्यतर्फ रु १ अर्ब ७२ करोड ४० लाख राजस्व सङ्कलन कार्यालयको तथ्यांकमा उल्लेख छ ।
कार्यालयको गत आर्थिक वर्षमा चैत महिना बाहेक कुनै पनि महिनामा राजस्व संकलन लक्ष्यमा पुग्न सकेको थिएन् । कार्यालयले चैत महिनामा भने लक्ष्यभन्दा बढी अर्थात १०४ दशमलव ९ प्रतिशत राजस्व संकलन गरको थियो ।
भन्सार कार्यालयले अघिल्लो आर्थिक वर्ष २०८१/८२ मा पनि लक्ष्यअनुसारको राजस्व संकलन गर्न सकेको थिएन् ।
अघिल्लो आर्थिक वर्ष २०८१/८२ मा रु ११ अर्ब १६ करोड २६ लाख राजस्व संकलनको वार्षिक लक्ष्य रहेकामा रु ८ अर्ब ६६ करोड ९८ लाखमात्रै राजस्व सङ्कलन भएको भन्सार कार्यालयले जनाएको छ । जुन वार्षिक लक्ष्यको ७७ दशमलव ६७ प्रतिशतमात्रै रहेको थियो ।
