धनगढी । कैलालीबाट प्रहरीले अवैध लागूऔषधसहित ५ जनालाई पक्राउ गरेको छ । बिहीबार जिल्लाका विभिन्न ठाउँबाट उनीहरुलाई पक्राउ गरेको हो ।
जिल्लाको धनगढी उपमहानगरपालिका–४ बाट अवैध लागूऔषध खैरो हेरोइन जस्तो देखिने पदार्थ १ ग्राम ६५ मिलिग्रामसहित बैतडीको सुर्नया गाउँपालिका–३ घर भई हाल धनगढी उपमहानगरपालिका–४ कोठा गरी बस्ने २८ वर्षीय दीपक ऐरी,बैतडीको दोगडा केदार गाउँपालिका–६ घर भई धनगढी उपमहानगरपालिका–४ कोठा गरी बस्ने ३१ वर्षीय हेमन्त कार्की र कैलालीको गोदावरी नगरपालिका–१ बस्ने ३२ वर्षीय शम्भु भट्टलाई पक्राउ गरेको प्रहरीले जनाएको छ ।
लागूऔषध नियन्त्रण व्युरो शाखा कार्यालय धनगढी र अस्थायी प्रहरी पोष्ट चटकपुरबाट संयुक्त रुपमा खटिएको प्रहरीले शंका लागि चेकजाँच गर्दा उक्त पदार्थ फेला पारी उक्त पदार्थ सहित पक्राउ गरेको जनाएको छ ।
यसैगरी,धनगढी उपमहानगरपालिका–८ कान्तिपुर टोलबाट अवैध लागूऔषध खैरो हेरोइन जस्तो देखिने पदार्थ ३ ग्राम ६१४ मिलिग्राम सहित सोही उपमहानगरपालिका–७ बस्ने १९ वर्षीय महेश राना र कैलारी गाउँपालिका–७ घर भई हाल कान्तिपुर टोल डेरा गरी बस्ने १७ वर्षिय किशोरीलाई पक्राउ गरिएको जनाएको छ ।
लागूऔषध सेवन गरिरहेका छन भन्ने सूचनाको आधारमा जिल्ला प्रहरी कार्यालय कैलालीबाट खटिएको प्रहरीले १७ वर्षिय किशोरीको कोठा खानतलासी गर्दा उक्त पदार्थ फेला पारी उक्त पदार्थ सहित पक्राउ गरेको जनाएको छ ।
