धनगढी । चालकको लापरबाहीका कारण बढी सवारी दुर्घटना भएको पाइएको छ । सुदूरपश्चिम प्रदेशमा गत असार महिनामा भएका सवारी दुर्घटनामा सबैभन्दा बढी चालकको लापरबाहीका सवारी दुर्घटना कारण भएका छन् ।
सुदूरपश्चिममा गत असारमा ८३ वटा सवारी दुर्घटना भएकामा ७१ वटा सवारी दुर्घटना चालकको लापबाहीका कारण भएका सुदूरपश्चिम प्रदेश प्रहरी कार्यालय धनगढीले जनाएको छ ।
त्यस्तै,सवारी साधनका कारण २,मादक पदार्थ सेवनका कारण २,यात्रुका कारण २,सडकको अवस्थाका कारण २ र चौपायाका कारण ४ वटा दुर्घटना भएको सुदूरपश्चिम प्रदेश प्रहरी कार्यालय धनगढीका प्रवक्ता प्रहरी वरिष्ठ उपरीक्षक पदमबहादुर बिष्टले जानकारी दिए ।
उनका अनुसार उक्त दुर्घटनामा १०७ सवारीसाधन संलग्न रहेका,दुर्घटनामा १३ जनाको मृत्यु भएको तथा १९७ जना घाइते भएका छन् ।
त्यस्तै,उक्त एक महिनामा प्रदेशभरी भएका ८५ वटा विभिन्न विपद्जन्य घटनामा परि ८ जनाको मृत्यु भएको सुदूरपश्चिम प्रदेश प्रहरी कार्यालयको तथ्यांकमा उल्लेख छ ।
उक्त विपदका घटनाबाट ६४ जना घाइते भएका तथा ४ लाख ७९ हजार बराबरको क्षति भएको जनाइएको छ ।
त्यस्तै,प्रहरीले सो एक महिनामा प्रदेशभरी १ हजार ३० समुदाय केन्द्रित तथा ३३७ वटा विद्यालय केन्द्रित कार्यक्रम गरेको जनाएको छ । सो कार्यक्रममा ४० हजार ५४ जनाको सहभागिता रहेको प्रहरीले जनाएको छ ।
