धनगढी । जिल्ला प्रशासन कार्यालय कैलालीमा राष्ट्रिय परिचयपत्र बनाउन आउने सेवाग्राहीको अत्यधिक चाप बढेपछि नागरिकहरू पालो नपाएर फर्किन बाध्य भएका छन् ।
जिल्लाका विभिन्न स्थानीय तहबाट सेवा लिन आएका सेवाग्राहीले ३–४ दिनसम्म पालो कुर्नुपरेको गुनासो गरेका छन् । बैंकिङ सेवा, सामाजिक सुरक्षा भत्ता तथा अन्य सरकारी सेवामा राष्ट्रिय परिचयपत्र अनिवार्य भएपछि पछिल्ला केही दिनयता सेवाग्राहीको संख्या अस्वाभाविक रूपमा बढेको हो ।
प्रशासनका अनुसार कार्यालयमा दैनिक ५ सयभन्दा बढी सेवाग्राही पुग्ने गरे पनि हाल महिला १ सय र पुरुष १ सय गरी जम्मा २ सय जनालाई मात्र सेवा दिइँदैछ । सीमित क्षमताका कारण अधिकांश सेवाग्राही सेवा नपाई फर्कनुपरेको छ ।
एकै दिनमा काम नभएपछि पटक–पटक कार्यालय धाउनुपर्ने बाध्यता छ । अत्यधिक गर्मीमा साना बालबालिका च्यापेर आएका नागरिकहरू समेत घण्टौँ लाइनमा बस्न बाध्य छन् ।
जिल्ला प्रशासन कार्यालय कैलालीका सहायक प्रमुख जिल्ला अधिकारी तथा सूचना अधिकारी खडानन्द खत्रीले सामाजिक सुरक्षा भत्तासम्बन्धी प्रक्रियाका कारण केही समयका लागि चाप बढेको बताए ।
‘हाल देखिएको भीड अस्थायी प्रकृतिको हो। केही सातापछि चाप घट्ने अपेक्षा छ । भीड व्यवस्थापनका लागि टोकन प्रणाली लागू गरिएको छ र उपलब्ध जनशक्ति तथा तोकिएको मापदण्डअनुसार सेवा प्रवाह भइरहेको छ,’ उनले भने ।
सेवाग्राहीहरूले भने दैनिक सेवा क्षमता बढाउन, आवश्यक जनशक्ति थप परिचालन गर्न र बढी संख्यामा नागरिकलाई सेवा उपलब्ध गराई सास्ती कम गर्न प्रशासनसँग माग गरेका छन् ।
