कैलाली । कैलालीको चुरे गाउँपालिकाले आर्थिक वर्ष २०८२/८३ मा पूर्वाधार, शिक्षा, स्वास्थ्य, कृषि, पशु सेवा, रोजगार तथा सामाजिक सुरक्षालगायतका क्षेत्रमा उल्लेखनीय उपलब्धि हासिल गरेको जनाएको छ। गाउँपालिकाले सार्वजनिक गरेको वार्षिक प्रगति विवरणअनुसार अधिकांश योजना सफलतापूर्वक सम्पन्न भएका छन्।

गाउँपालिका अध्यक्ष चक्र बोगटीले सीमित स्रोत–साधनका बाबजुद जनतासँग गरिएको प्रतिबद्धताअनुसार विकास निर्माण, सेवा प्रवाह र सामाजिक विकासका क्षेत्रमा उल्लेखनीय उपलब्धि हासिल भएको बताए। आगामी वर्षमा पनि विकासलाई अझ प्रभावकारी, पारदर्शी र जनमुखी बनाइने उनको भनाइ छ।

उपाध्यक्ष धनादेवी थापाले महिला, बालबालिका, स्वास्थ्य, शिक्षा तथा सामाजिक सुरक्षाका कार्यक्रमलाई प्राथमिकतामा राखेर कार्यान्वयन गरिएको बताइन्। स्थानीय नागरिकको जीवनस्तर सुधार गर्ने उद्देश्यले सञ्चालन गरिएका कार्यक्रमबाट सकारात्मक परिणाम देखिन थालेको उनको भनाइ छ।

प्रमुख प्रशासकीय अधिकृत धर्मराज खत्रीका अनुसार आर्थिक वर्ष २०८२/८३ मा २१६ वटा योजना पूर्ण रूपमा सम्पन्न भएका छन् भने ४ वटा योजना आंशिक रूपमा कार्यान्वयन भएका छन्। उनका अनुसार ७.१९ किलोमिटर नयाँ सडक ट्र्याक खोलिएको, ३२० किलोमिटर सडक सरसफाइ तथा स्तरोन्नति गरिएको, ६ वटा विद्यालय भवन तथा वडा नं. ३ र ४ का वडा कार्यालय भवन निर्माण सम्पन्न भएका छन्।
सामाजिक सुरक्षातर्फ १ हजार ७५० जना लाभग्राहीलाई कुल ६ करोड ४२ लाख ६९ हजार ९४५ रुपैयाँ सामाजिक सुरक्षा भत्ता वितरण गरिएको छ। कर सम्बन्धी दुईवटा जनचेतनामूलक कार्यक्रम सञ्चालन गरिएको गाउँपालिकाले जनाएको छ।

कृषि तथा पशु सेवातर्फ ६९ वटा मिनिटिलर, १५३ वटा प्लास्टिक टनेल, ५ वटा कुटानी–पिसानी मिल, १८ वटा बोका, ६ वटा गोठ सुधार तथा ४ वटा विद्युतीय घाँस काट्ने मेसिन वितरण गरिएको छ। साथै १० हजार ९७६ पशुलाई खोरेत, १ हजार ९७८ पशुलाई लम्पीस्किन, ३९ हजार ९२३ बाख्रालाई पीपीआर तथा ६ सय कुकुरलाई रेविजविरुद्ध खोप लगाइएको छ।

रोजगारतर्फ प्रधानमन्त्री रोजगार कार्यक्रमअन्तर्गत ६ वटा योजना सम्पन्न भएका छन्। वैदेशिक रोजगारबाट फर्किएका व्यक्तिका लागि उद्यमशीलता प्रवर्द्धनसहित चार कार्यक्रम सञ्चालन गरिएको तथा ४२५ जना बेरोजगारलाई रोजगार सूचना व्यवस्थापन प्रणालीमा सूचीकृत गरिएको छ। गाउँपालिकाले अनलाइनमा आधारित एकीकृत प्रोफाइलसमेत तयार गरेको छ।
शिक्षा क्षेत्रमा ४७ जना शिक्षकलाई सूचना प्रविधिसम्बन्धी तालिम प्रदान गरिएको, दुई विद्यालयमा आईसीटी ल्याब र पुस्तकालय स्थापना गरिएको तथा राष्ट्रपति रनिङ शिल्ड, अध्यक्ष कप र वडा स्तरीय भलिबल प्रतियोगिता सञ्चालन गरिएको छ।

स्वास्थ्यतर्फ अध्यक्ष एकीकृत विशेषज्ञ स्वास्थ्य शिविरबाट १ हजार ४५३ जनाले सेवा लिएका छन्। २९७ गर्भवती तथा सुत्केरी महिलालाई पोषण प्याकेज, ५५६ महिलाको पाठेघर क्यान्सर परीक्षण, ८० विपन्न परिवारको स्वास्थ्य बीमा तथा १९ जना एचआईभी संक्रमितलाई उपचार सहयोग उपलब्ध गराइएको छ। यसैगरी २० हजार ९९४ नयाँ सेवाग्राहीले स्वास्थ्य सेवा लिएका, २०२ संस्थागत सुत्केरी भएका तथा पालिका पूर्ण खोप सुनिश्चित पालिका घोषणा भएको छ।
भूमि व्यवस्थापनतर्फ २ हजार ९५१ भूमिहीन तथा अव्यवस्थित बसोबासी परिवारको लगत संकलन तथा निस्सा वितरण गरिएको छ, जसबाट २३ लाख ९ हजार रुपैयाँ राजस्व संकलन भएको छ। उद्यम विकास कार्यक्रममार्फत २२८ जनालाई विभिन्न तालिम प्रदान गरिएको तथा २९ जना नयाँ लघु उद्यमी तयार गरिएको गाउँपालिकाले जनाएको छ।

गाउँपालिकाको आर्थिक विवरणअनुसार चालु खर्च ३० करोड ९३ लाख ७९ हजार ८६३ रुपैयाँ, पुँजीगत खर्च १२ करोड ४४ लाख ९१ हजार १७९ रुपैयाँ गरी कुल ४३ करोड ३८ लाख ७१ हजार ४२ रुपैयाँ खर्च भएको छ, जुन कुल बजेटको ७८.९५ प्रतिशत हो।

प्रमुख प्रशासकीय अधिकृत धर्मराज खत्रीले गाउँपालिकाले आगामी वर्षमा पनि सुशासन, पारदर्शिता र प्रभावकारी सेवा प्रवाहलाई थप सुदृढ गर्दै नागरिकमुखी विकासलाई निरन्तरता दिने प्रतिबद्धता व्यक्त गरे।