धनगढी। कैलालीको गौरीगंगा नगरपालिका–४ स्थित द ग्रीन स्टार इङ्ग्लिस स्कुल मा कक्षा १ मा अध्ययनरत ७ वर्षीय बालक आरभ बोहराको मोटरसाइकलको ठक्करबाट उपचारका क्रममा मृत्यु भएको छ । घटनापछि परिवारले विद्यालयको लापरबाहीका कारण बालकले ज्यान गुमाउनुपरेको आरोप लगाएको छ ।
प्रहरीका अनुसार मंगलबार पूर्व–पश्चिम राजमार्गमा मोटरसाइकलले ठक्कर दिँदा गम्भीर घाइते भएका आरभको भेन्टिलेटरमा राखेर उपचार भइरहेको थियो । उपचारकै क्रममा शुक्रबार उनको मृत्यु भएको हो ।
मृतकका बुबा दिलीप बोहराले अभिभावक लिन नआउँदै विद्यालयले कक्षा १ का विद्यार्थीलाई एक्लै घर जान दिएको आरोप लगाएका छन् । उनका अनुसार विद्यालयको बिदा १२ बजे हुने भए पनि साढे ११ बजे नै आरभलाई विद्यालय बाहिर पठाइएको थियो ।
‘विद्यालयको लापरबाहीले मेरो छोरालाई मोटरसाइकलले ठक्कर दिएको हो । विद्यालयको कमजोरीले मैले छोरा गुमाएँ,’ उनले भने, ‘मेरो जस्तो नियति अरू कसैको परिवारले भोग्न नपरोस् ।’
बोहराले घटनाको निष्पक्ष छानबिन गरी विद्यालयमाथि आवश्यक कारबाही गर्न माग गरेका छन् । यसअघि पनि विद्यालयको कमजोरीका कारण यस्ता घटना भए पनि सुधार नभएको उनको दाबी छ ।
यता विद्यालय प्रशासनले भने आरभलाई छिमेकी विद्यार्थीकी हजुरआमासँगै घरतर्फ पठाइएको जनाएको छ ।
प्रहरीले ठक्कर दिने मोटरसाइकलका चालक २६ वर्षीय सागर चौधरी र पछाडि सवार गुटराम डगौरा थारूलाई पक्राउ गरेको जनाएको छ । चालक चौधरीसँग सवारी चालक अनुमति पत्र (लाइसेन्स) समेत नभएको प्रहरीले जानकारी दिएको छ ।
