धनगढी। सुदूरपश्चिम प्रदेश सभा सदस्य प्रकाशबहादुर देउवा ११ महिनादेखि सदनमा अनुपस्थित छन् । तर प्रदेश सभा सदस्यका रूपमा पाउने तलब र सेवा–सुविधा भने नियमित रूपमा उनको बैंक खातामा जम्मा भइरहेको छ ।
पूर्वभौतिक पूर्वाधार विकासमन्त्रीसमेत रहेका देउवा गएको भदौ २३ र २४ गते भएको जेन्जी आन्दोलन पछि भदौ २८ गते व्यक्तिगत कामका लागि अमेरिका गएका थिए । स्वास्थ्यमा समस्या देखिएको भन्दै उनले आठ महिनापछि अर्थात् २०८२ चैत २३ गते सभामुख भीमबहादुर भण्डारीलाई पत्र पठाएर प्रदेश सभा बैठकमा उपस्थित हुन नसक्ने जानकारी दिएका थिए ।
स्वास्थ्यमा सुधार भएपछि नेपाल फर्केर संसदीय जिम्मेवारीमा सक्रिय हुने प्रतिबद्धता उनले पत्रमा जनाएका थिए । तर त्यो पत्र पठाएको ४ महिनाभन्दा बढी बितिसक्दा पनि उनी नेपाल फर्किएका छैनन् । नेपाली कांग्रेसका तत्कालिन सभापति शेरबहादुर देउवाका भतिजा समेत रहेका उनी कैलाली क्षेत्र नं. ५ (२) बाट निर्वाचित सांसद हुन् ।
उनी अहिले कहाँ छन्, कहिले फर्किन्छन् भन्ने नेपाली कांग्रेस कैलालीलाई पनि केही जानकारी छैन । नेपाली कांग्रेस कैलालीका सचिव नृपबहादुर सुनारका अनुसार २–३ महिनाअघि फोनमा कुरा हुँदा छिट्टै आउँछु भनेका थिए । त्यसयता उनीसँग सम्पर्क भएको छैन ।
सुदूरपश्चिम प्रदेश सभा सचिवालयका सूचना अधिकारी युवराज जैसीले प्रदेश सभाबाट अन्यथा निर्णय नभएसम्म तलब वा सुविधा रोक्न नमिल्ने बताए । ‘उहाँमाथि प्रदेश सभाबाट कुनै निर्णय भएको छैन । त्यसैले नियमअनुसार सेवा–सुविधा नियमित रूपमा खातामा पठाइरहेका छौँ,’ उनले भने ।
प्रदेश सभा नियमावली, २०८० अनुसार कुनै सदस्य लगातार १० वटा बैठकमा सूचनाविना अनुपस्थित भए पद रिक्त हुन सक्छ । देउवाले ८ बैठकपछि सभामुखलाई सूचना पठाएका थिए । त्यसैले हालसम्म पद रिक्त गर्ने प्रक्रिया अघि नबढेको सुदूरपश्चिम प्रदेश सभा सभामुख भीमबहादुर भण्डारीले बताए ।
कैलाली क्षेत्र नं. ५ (२) का मतदाता भने असन्तुष्ट छन् । मतदाता भन्छन्, ‘हामीले जिताएर पठाएको नेता ११ महिनादेखि देखिएको छैन । हाम्रो ठाउँमा डुबान, सडक र खानेपानीको समस्या छ । ती कुरा प्रदेश सभामा उठाउने मान्छे नै विदेशमा हुनुहुन्छ ।’
