धनगढी । सुदूरपश्चिमको धनगढीमा हुर्किएका २६ वर्षीय नितेश पन्तले बनाएको कृत्रिम बुद्धिमत्ता (एआई) उत्पादन ‘अल्केमी’ले अमेरिकी व्यवस्थापन परामर्श क्षेत्रमा नयाँ चर्चा पाएको छ ।
अमेरिकी एआई कम्पनी डेभड्यास ल्याब्समा उत्पादन तथा बजार विस्तार प्रमुखका रूपमा कार्यरत नितेशको नेतृत्वमा विकसित ‘अल्केमी’ ले कम्पनीलाई कसलाई, कहिले र किन सम्पर्क गर्ने भन्ने विषयमा तथ्यमा आधारित सुझाव दिन्छ ।
सामान्य च्याटबटभन्दा फरक ‘अल्केमी’ले कम्पनीभित्रका पुराना सम्बन्ध, अघिल्ला संवाद र बजारका परिवर्तन विश्लेषण गरेर व्यावसायिक अवसर पहिचान गर्न मद्दत गर्छ । यसको अर्को विशेषता पुष्टि गर्न नसकिने जानकारी नदिनु रहेको छ ।
नितेशको यो सफलता पहिलो प्रयासमा आएको होइन । २०२४ देखि २०२६ सम्म उनले ६ वटा एआई उत्पादन विकासको नेतृत्व गरे । तीमध्ये ४ वटा असफल भए, पाँचौँ ‘नोक्याप’ खुला स्रोत भए पनि लोकप्रिय भएन ।
ती अनुभवबाट सिकेर बनाएको ‘अल्केमी’ कम्पनीको पहिलो सफल व्यावसायिक उत्पादन बनेको हो । उनका अनुसार सबैभन्दा ठुलो चुनौती सफ्टवेयर बनाउनु थिएन, ग्राहकको वास्तविक समस्या बुझ्नु थियो । त्यसैले उत्पादन अघि उनले १२५ भन्दा बढी व्यवसायी र परामर्शदातासँग प्रत्यक्ष कुरा गरेका थिए ।
नितेश भन्छन्, ‘कृत्रिम बुद्धिमत्ताले अनुसन्धान र प्रतिवेदनको काम सहज बनाएको छ । तर निर्णय गर्ने, विश्वास बनाउने र जिम्मेवारी लिने काम अझै मानिसकै हो । जब विश्लेषण सस्तो हुन्छ, सम्बन्ध अझ मूल्यवान् बन्छ ।’
‘अल्केमी’को अधिकांश प्राविधिक काम काठमाडौंस्थित नेपाली टोलीले गरिरहेको छ । नितेशका अनुसार कम्पनीको लक्ष्य नेपाललाई सस्तो श्रमको केन्द्र होइन, विश्वस्तरीय प्रविधि उत्पादन गर्ने राष्ट्र बनाउनु हो । कम्पनीको नारा पनि नेपालीमै छ- ‘दामी काम गरौँ ।’
नितेशको धनगढीदेखि डार्टमाउथसम्मको यात्रा
२०१६ मा कक्षा १० मा पढ्दा एक विद्यार्थी ८ वटै आइभी लिगमा भर्ना भएको खबरले नितेशलाई प्रेरित गर्यो । धनगढीमा अमेरिकी क्याम्पसमा भर्नाका लागि दिइने शैक्षिक मूल्याङ्कन परीक्षा (एसएटी) को सुविधा नभएपछि उनी काठमाडौं गएर स्वअध्ययन गरे । पहिलो पटक १३८० र दोस्रोमा १५१० अंक ल्याएपछि डार्टमाउथ कलेजमा छात्रवृत्तिमा पढ्ने अवसर पाए ।
कोभिडमा नेपाल फर्केर उनले परिवारको अस्पताल निर्माणमा पनि काम गरे । अहिले उनी आफूलाई संस्थापकभन्दा उत्पादन प्रमुख भन्न रुचाउँछन् । ‘नेपाली इन्जिनियरले विश्वकै जटिल समस्या समाधान गर्ने प्रविधि बनाउन सक्छन् । ‘अल्केमी’ त्यसको उदाहरण हो,’ उनले भने, ‘त्यसैको प्रमाणका रूपमा अमेरिकी ग्राहकका लागि नेपालमै बसेर विश्वस्तरीय एआई उत्पादन विकास गरिरहेका छौँ ।’
व्यावसायिक सेवा क्षेत्रमा कृत्रिम बुद्धिमत्ताको प्रयोग तीव्र बन्दै गएको वर्तमान समयमा धनगढीबाट सुरु भएको एक नेपाली युवाको यात्रा विश्व बजारका लागि प्रविधि निर्माण गर्ने नयाँ पुस्ताको प्रतिनिधि कथाका रूपमा उभिएको छ ।
