धनगढी- कैलाली निर्वाचन क्षेत्र नम्बर ५ ‘ख’ का प्रदेशसभा सदस्यका स्वतन्त्र उम्मेदवार क्षितिज भण्डारीले धनगढी उपमहानगरपालिका वडा नम्बर १३ मा रहेको निङलाशैनी मन्दिर पुगेर कसम खाएका छन् । भण्डारीले बुधवार मन्दिरमा पुगेर चुनाव जितेर गएमा कुनै पनि सरकारी सेवा सुविधा, तलब भत्ता नलिने कसम खाएका हुन् ।
भण्डारीले आफू जनताको सेवा गर्नकै लागि निर्वाचन लडिरहेको भन्दै कुनै पनि सरकारी सेवा सुविधा नलिने कसम खाएका हुन् । विगतदेखि नै आफूले सामाजिक काम गर्दै आएको र आगामी दिनमा पनि संसदमा जनताकै सेवाका लागि सक्रिय हुने भन्दै आफूले मन्दिरमा पुगेर कसम खाएको बताए ।
‘जितेर गएपछि मैले काम गर्छु भन्ने विश्वास जनतालाई दिलाउनुछ,’ उनले भने, ‘त्यही भएर मैले यस क्षेत्रको धार्मिक आस्थाको केन्द्र निङ्लासैनी मन्दिरमा पुगेर कसम खाएको छु ।’ धनगढीका अन्य मन्दिरहरुमा पुगेर पनि कसम खाने उनले बताए ।
