काठमाडौं- सुदूरपश्चिम प्रदेशका मुख्यमन्त्री राजेन्द्रसिंह रावलले कैदी जीवन बिताइरहेका रेशम चौधरीको रिहाइका लागि आफू सकारात्मक रहेको बताएका छन् ।आज (सोमबार) रिपोर्टर्स क्लब नेपालले आयोजना गरेको बधाई तथा सम्मान कार्यक्रमलाई सम्बोधन गर्दै मुख्यमन्त्री रावलले सो कुरा बताएका हुन्।
उनले भने, ‘‘मानवीय संवेदना समुदायबीचको द्वन्द्वलाई अन्त्य गर्न छ, सामाजिक एकत्व खोज्नु जरुरी छ । सकारात्मक सोचले अगाडि बढ्न जरुरी छ । रेशमजी मेरो समाजको कम्पोनेन्ट हो, त्यत्ति बुझ्न जरुरी छ ।’’ त्यस्तै, उनले सुदूरको पीडा राष्ट्रियस्तरमा जोडिन नसकेको गुनासो गरे ।
मुख्यमन्त्री रालवले आफ्नो राजनीति पद र प्रतिष्ठा प्राप्तिका लागि नभएको बताउँदै अबको पाँच वर्षको कार्यकालमा विगतलाई सम्मान गर्दै वर्तमानलाई क्रियाशील बनाउने प्रतिबद्धता व्यक्त गरे । उनले भने, ‘‘राजनीतिको सारथिका रूपमा मलाई आम जनताले निर्वाचित गराएका छन् । यो निर्वाचन मेरो व्यक्तिगत कुनै इच्छा र आकाङ्क्षाका लागि पद र प्रतिष्ठा होइन । मूलतः यो ती ग्रामीण क्षेत्रका नागरिकको समस्या, पीडा, राष्ट्र र राष्ट्रियता, समावेशिताको मुद्दासँग जोडिएको छ ।’’
सुदूरपश्चिमलाई छाउपडी र देउकी प्रथा भएको ठाउँको रूपमा मात्रै चिनिएको भन्दै काठमाडौंमा कुमारी प्रथाको देवत्वकरण भएजसरी सुदूरका सामाजिक सांस्कृतिक परम्परालाई उजागर गर्नुपर्ने उनले औँल्याए ।
‘‘सुदूरपश्चिमका लाखौँलाख झुपडीको एकत्वलाई मैले हेर्न जरुरी छ । सामाजिक विकृति र विसङ्गतिको क्षेत्रमा भएका समस्यासँग जुध्न जरुरी छ । काठमाडौंमा कुमारी प्रथाको देवत्व भयझैँ सुदूरका सामाजिक–सांस्कृतिक परम्परालाई उजागर गरेर भोलिका दिनमा उत्पादनका रूपमा ल्याउने चुनौती पनि मसँग छ,’’ उनले भने ।
सुदूरपश्चिमलाई सुदूर नभएर सुगम बनाउन हातेमालोका लागि पनि उहाँले आग्रह गरे । ‘‘अब सुदूर होइन, सुगम कसरी बनाउन सकिन्छ रु यो क्षेत्रका पीडा उजागर गरेर समाधान कसरी गर्न सकिन्छ, अब यसमा हातेमालो गरौँ ।,’’ मुख्यमन्त्री रालवले भने, ‘‘देउडा कल्चरको मान्छे हुँ म, सखिया नृत्य नाच्ने क्षेत्रको मान्छे हुँ म । होली नाच नाच्ने क्षेत्रको मान्छे हुँ । यो कल्चरल फ्युजनलाई लिएर हामी कसरी अघि बढ्न सक्छौँ रु यहाँहरूसँग हातेमालो गर्न चाहान्छौं ।’’
साथै, आफूले सुदूरले खोजेको समृद्धि जनताका सामान्य कुरा शिक्षा, स्वास्थ्य, रोजगारीको सिर्जनालगायत भएको उनको भनाइ छ । सुदूरको समृद्धिका लागि पढाइ, कमाइ र दवाईको अभियान, सुदूरको पानी, खानी र जवानीलाई बाहिर ल्याउन जरुरी रहेको उनले बताए । किताबमा आधारित शैक्षिक पद्धतिलाई परिवर्तन गरी भोलिका दिनमा सुदूर र सिङ्गो देशलाई आवश्यक पर्ने जनशक्ति विकास गर्नसक्ने खालको शिक्षा पद्धतिको विकास गर्नु अहिलेको आवश्यकता भएको उनको ठहर छ ।
