बैतडी – बैतडीको दशरथचन्द नगरपालिकामा जारी नगरस्तरीय महिला टी-२० क्रिकेट प्रतियोगिताअन्तर्गत आज भएका खेलमा दशरथचन्द नगरपालिका-२ देहिमाडौं र दशरथचन्द नगरपालिका-१० बाराकोट विजयी भएका छन्।
पहिलो खेलमा देहिमाडौंले दशरथचन्द नगरपालिका-५ लाई ६५ रनले जित्यो। १४४ रनको लक्ष्य पन्छाउने क्रममा दशरथचन्दले निर्धारित १५ ओभरमा ४ विकेटको क्षतिमा ७८ रन मात्रै बनाउन सक्यो। ममता लेखकले सर्वाधिक २७ रन बनाए पनि टोलीलाई जिताउन सकिनन्।
देहिमाडौंका लागि लक्ष्मी बोहरा, मनिषा बोहरा र निर्मला बोहराले १/१ विकेट लिए ।
त्यसअघि घरेलु मैदान निङ्लाशैनी क्रिकेट मैदानमा पहिला ब्याटिङ गरेको देहिमाडौंले १५ ओभरमा ६ विकेटको क्षतिमा १४३ रन बनायो। जसमा पिङ्की बोहराले ३१ र मनिषा बोहराले २७ रनको योगदान गरे।
दशरथचन्दका लागि आयुस्मा चन्द र चन्द्रा कोलीले २र२ विकेट लिए। देहिमाडौंकी मनिषा बोहरा ओम्यान अफ द म्याच चुनिएकी स्कोरर खेमराज भट्टले जानकारी दिए।
दोस्रो खेलमा दशरथचन्द नगरपालिका-११ नागार्जुनलाई बाराकोटले ५ विकेटले स्तब्ध पार्यो। नागार्जुनले दिएको ८८ रनको लक्ष्य बाराकोटले १२ ओभर १ बलमा ५ विकेटको क्षतिमा पूरा गर्यो। रितु बुडालले अविजित १९ र रिमी चन्दले १५ रनको योगदान गरे।
नागार्जुनकी जानकी भण्डारीले २ विकेट हात पारिन्। त्यसअघि पहिला ब्याटिङ गरेको नागार्जुनले निर्मला भण्डारीको २२ रनको मद्दतमा १५ ओभरमा ७ विकेटको क्षतिमा ८७ रन बनायो।
बाराकोटका ममता लावड र राया धामीले २र२ विकेट लिए। बाराकोटकी रितु बुडाल ओम्यान अफ द म्याच चुनिइन्।
वर्षाका कारण आजका खेल १५/१५ ओभरका खेलाइएको प्रतियोगिता संयोजक वीरसिंह बोहराले जानकारी दिए। दशरथचन्द नगरपालिकाको वार्षिक कार्यक्रम र नगर खेलकुद विकास समितिको आयोजनामा माघ ९ गते शुरू भएको प्रतियोगिता माघ १७ गते सकिनेछ।
नगरका ७ टोलीको सहभागिता रहेको प्रतियोगिताको प्रथम पुरस्कार नगद २५ हजार, ट्रफि, मेडल र प्रमाणपत्र, द्वितीय पुरस्कार नगद १५ हजार, ट्रफि मेडल र प्रमाणपत्र रहेको दशरथचन्द नगर खेलकुद विकास समितिका अध्यक्ष भूपेन्द्र चन्दले बताए।
