बाजुरा – नेपाल प्रहरीका प्रहरी महानिरीक्षक बसन्त बहादुर कुँवरले प्रहरी जनताको सेवा र शान्ति सुरक्षामा सदैव प्रतिबद्ध र इमान्दार हुनु पर्नेमा जोड दिएका छन् ।
जिल्ला प्रहरी कार्यालयको भवन उद्घाटनका लागि बाजुरा पुग्नुभएका प्रहरी महानिरीक्षक कुँवरले शान्ति सुव्यवस्था विना देशको विकास र समृद्धिको आधार नै निर्माण गर्न नसकिने बताए ।
बाजुरामा निर्माण गरिएको प्रहरीको प्रशासनिक भवन, ब्यारेक, हिरासत, निवास तथा मेस घरहरूको प्रहरी कार्यालय परिसरमा आयोजित औपचारिक उद्घाटन कार्यक्रममा महानिरीक्षक कुँवरले प्रहरीले दिने सेवा प्रवाहमा समेत सुधार हुनुपर्ने बताए ।
उहाँले सुरक्षित र सुविधा सम्पन्न भवन निर्माणले प्रहरीको मनोबल बढ्नुका साथै ऊर्जा र हौसला थपिएको भन्नुहुँदै प्रहरीले भवन उद्घाटनसँगै जिम्मेवारी र दायित्व बढेको महशुस गर्नुपर्नेमा जोड दिए ।
“‘मेरो निर्देशन छ, जनताको सेवा, देशको रक्षा, अपराधीलाई, कानुनको कार्यान्वयन र देश समृद्धिको यात्रामा प्रहरी इमान्दार पूर्वक सहयोगी बन्नुपर्छ”, महानिरीक्षक कुँवरले भने ।
“नयाँ भवनले चुनौती र जिम्मेवारी अझै बढेको छ । बढी मेहनत र जिम्मेवार हुन जरुरी देखिन्छ । प्रहरीका लागि भवन मात्रै राम्रो सुविधा सम्पन्न भएर हुँदैन बस्ने संरचना जस्तै शान्ति सुरक्षा र जनसेवामा पनि प्रहरी अब्बल हुनुपर्छ”, उनले भने ।
प्रत्येक नागरिकलाई शान्ति सुरक्षाको महशुस गराउनु प्रहरीको दायित्व हो भन्दै उनले प्रहरीको अधिकारका लागि प्रहरी प्रधान कार्यालय नक्साल प्रतिबद्ध र जिम्मेवार हुनेमा विश्वस्त हुन पनि आग्रह गर्नुभयो ।
उहाँले निष्ठा, इमान र जिम्मेवारी निर्बिसी दूर दराजका नागरिकलाई सेवा दिन कुनै कसुर बाँकी नराख्न र व्यक्तिगत लाभभन्दा माथि कर्तव्य निष्ठा र इमानलाई कायम राख्न निर्देशन समेत दिए ।
महानिरीक्षक कुँवरले प्रहरीका लागि बनेका संरचना सबैका साझा र समुदायका पनि सम्पत्ति भएकोले यसलाई सुरक्षित राख्न र अपनत्व सहितको दायित्व बोध गर्न सबैलाई आग्रह गरे ।
