धनगढी- कैलालीको धनगढी उपमहानगरपालिका–६ मटियारीकी सुशीला रानाले ८ कठ्ठा जग्गामा व्यवसायिक तरकारी खेती गर्दै आएकी छन् । उनको परिवारले विगत लामो समयदेखि व्यवसायिक तरकारी खेती गर्दै आएका छन् ।
उनले अहिले बारीमा काउली,बन्दा,टमाटर,खुसार्नी,आलुलगायतको तरकारी लगाएको बताइन् । तरकारी खेतीबाट राम्रै आम्दानी हुने गरेको उनी बताउँछिन् । तरकारी खेतीबाट घरखर्च चलाउन धेरै सहज हुने उनको भनाइ छ । उनले भनिन् ‘हाम्रो परिवारले लामो समयदेखि तरकारी खेती गर्ने गरेका छौँ । पाँच जनाको परिवार छ । तरकारीबाट हुने आम्दानीले घरखर्च चलाउन एकदमै सहज भएको छ । तरकारीको बजार भाउ बढेको बेला झन राम्रो आम्दानी हुन्छ ।’
उनले अहिले दैनिक बजारमा तरकारी बेच्न लैजाने गरेको बताइन् । उनले भनिन् ‘बिहान सधै बजार लगेर तरकारी बेच्छु । अहिले तरकारी कम पाइने भएकाले मूल्य पनि बढी छ । दैनिक दुई हजारसम्मको तरकारी बिक्री हुन्छ ।’
उनले भनिन् ‘बिक्री गर्नमा समस्या हुँदैन् । तरकारी नबिक्ने भन्ने हुँदैन् । सहजै विक्री हुन्छ ।’ उनले तरकारीखेतीबाट वार्षिक दुईलाख सम्म आम्दानी हुने बताइन् । ‘मेहनत गर्न सके राम्रै आम्दानी हुन्छ’ उनले भनिन् ।
त्यस्तै,सोही ठाउँकी तुला रानाले पनि बिगत लामो समयदेखि व्यावसायिक तरकारी खेती गर्दै आएको बताइन् । उनले अहिले ३ कठ्ठा जग्गामा तरकारीखेती गरेको बताइन् । उनले पाँच कठ्ठामा आलू खेती पनि गरेकी छन् । तरकारी बिक्रीबाट कमाइ राम्रै हुने गरेको उनले बताइन् ।
उनले भनिन् ‘छ जनाको परिवार छ । तरकारी बिक्रीबाट घरखर्च राम्रै चलेको छ । छोराछोरीको पढाइलेखाइ खर्च पनि यसैबाट धानेकी छु । अहिले बजारमा दैनिक एक हजारसम्मको तरकारी बिक्री गर्छु ।’
उनले भनिन् ‘तरकारी खेतीमा मेहनत बढी लाग्छ । औषधी पनि छर्नु पर्छ । मेहनत अनुसारको आम्दानी पनि हुन्छ ।’ तरकारीखेतीबाट भएको आम्दानीले गाह्रो अप्ठेरो पर्दा पनि सहज हुने गरेको उनको भनाइ छ ।
