कैलाली । भनिन्छ नी मेहनत गरे एकचोटी सफलता हात लाग्छ । यस्तै भएको छ धनगढी उपमहानगरपालिका–१४ एचगाउँ बस्ने ३६ वर्षीया भावना पुलामीमगरलाई पनि । विदेश जान तयार भएकी भावना आर्थिक अभावका कारण विदेश जान सकिनन् । अहिले उनले विदेशजस्तै कमाइ यही गर्न थालेकी छन् ।

उनले भनिन् ‘खान,लाउन,बस्न  समस्या थियो । दुई छोराछोरी पढाउन हम्मे हम्मे थियो । आर्थिक अवस्था नाजुक भएका कारण मलेसिया जानका लागि पासपोर्ट बनाए । पैँसा थिएन, कम्पनीले जानका लागि ३ लाख लाग्छ भन्यो,जान सकिन ।’

‘२० जनाको समूहमा एक लाख ५० हजारको लगानीमा शानीडाँडा दुनाटपरी उद्योग सञ्चालनमा ल्यायौँ । त्यसपछि मेरो सफलता यहीबाट सुरु भयो’ उनले भनिन् । पहिले समूहमा उद्योग सञ्चालन गरे पनि अहिले उनी एक्लैले उद्योग सञ्चालन गर्दै आएको उनले बताइन् ।

‘सबैले उद्योग छोड्दै गए पछि यो उद्योग आफ्नो काँधमा आयो । मैले सञ्चालन गरेको ६ वर्ष जति भयो । मासिक १ लाख हुन्छ बराबरको कारोबार हुन्छ’ उनले भनिन् ‘८ हजार तलवमा एक जना कामदार पनि राखेकी छु । सबै खर्च कटाएर मासिक ३० हजार बचत हुन्छ । वर्षको ३ लाख ६० हजार बचत हुन्छ ।’

उनका श्रीमान विदेशी भुमि साउदीमा रहेको उनी बताउँछिन् । उनले भनिन् ‘श्रीमान साउदी हुनुहुन्छ । दुई छोराछोरीलाई पढाई रहेकी छु । अरुलाई तालिम पनि दिइरहेकी छु । पैँसाको पनि कमी छैन ।’

‘पहिले घरको अवस्था नाजुक त छँदै थियो । बस्नका लागि घर थिएन, सानो झुपडी मात्र थियो’ उनले भनिन् ‘अहिले यही पेसाबाट भएको कमाईबाट ४ कोठे पक्की बनाएकी छु । मेहनत गर्न सके कामको खोजीमा विदेश जानु पर्दैन आफ्नै देशमा राम्रो गर्न सकिन्छ ।’
थोरै लगानीबाट राम्रो आम्दानी गर्न सकिने उनको भनाइ छ । दुनाटपरी सम्बन्धी ६२ जनालाई तालिम दिइसकेको बताउँदै उनले बर्दिया अछामबाट पनि काम सिक्न आउने गरेको बताइन् ।

उनले भनिन् ‘मबाट सिकेर गएका महिलाहरु राम्रो गरिरहेका छन् । दुनाटपरीको बजार छ । उत्पादन भएका दुना र टपरी पोखरासम्म खपत हुने गरेको छ । दिनको ३ हजार दुना र ३ हजार टपरी उत्पादन हुने गरेको छ ।’

सुदुरपश्चिमको डडेल्धुरा,महेन्द्रनगर,झलारी लगायतका स्थानमा दुनाटपरीको खपत हुने गरेको उनले बताइन् । ‘मुख्यबजार भनेको पोखरा हो’ उनले भनिन् ‘एक पिस दुनाको एक रुपैयाँ र टपरीको तिन रुपैयाँ ९५ पैसामा बिक्री गर्ने गरेकी छु । प्याकिङ,फिनिसिङ मेसिन नुहँदा समस्या छ ।’

‘हामीले उत्पादन गरेको दुनाटपरीलाई अन्यले प्याकिङ गरेर आफ्नै कम्पनीको छाप सहित महंगोमा विदेश पठाउँछन्’ उनले भनिन् ‘मैले गरेको उत्पादन उनीहरुले ४० रुपैयाँसम्ममा बिक्री गर्ने गरेका छन् । मेसिन आफूसँग भएको भए आफ्नै कम्पनीको छाप लगाएर पठाइन्थ्यो । कामको प्रतिफल पनि पाइने महंगोमा पनि बिक्री हुने थियो ।’

सरकारबाट आफूले अनुदान नपाएको उनको गुनासो छ । उनले भनिन् ‘सरकारले हामी जस्तालाई कहाँको अनुदान दिनु,चलाख र पार्टीका कार्यकर्ता नेताहरुलाई पो हो अनुदान पाइने’ उनले दुःखेसो गर्दै भनिन् ‘हामी गरिखानेलाई कोही पनि हेर्दैनन् । सरकारले हामी जस्तोलाई हेरिदिएको भए धेरै राहत हुने थियो ।’