धनगढी । कैलालीको गोदावरी नगरपालिका–८ मा रहेको शारदा माध्यमिक विद्यालयको व्यवस्थापन समितिको अध्यक्षमा चक्र खडायत सर्वसम्मत रूपमा निर्वाचित भएका छन्।
मंगलबार बसेको विद्यालय, शिक्षक र अभिभावक समिति संयुक्त बैठकले खडायतलाई अध्यक्ष चयन गरेको हो। नियुक्तिपछि आयोजित औपचारिक कार्यक्रममा विद्यालयका प्रधानाध्यापक भोजराज जोशीसहित विद्यालय परिवारले खडायतलाई स्वागत गर्नुका साथै बधाई दिएका थिए।
हाल सो विद्यालयमा १८ जना शिक्षक/शिक्षिका र १५० भन्दा बढी विद्यार्थी अध्ययनरत छन्। नव निर्वाचित अध्यक्ष खडायतले विद्यालयलाई थप व्यवस्थित, पारदर्शी र गुणस्तरीय बनाउने प्रतिबद्धता व्यक्त गरेका छन्। उनले आफ्नो नेतृत्वमा नवीन योजना र दीर्घकालीन दृष्टिकोणसहित समग्र विकासमा ध्यान केन्द्रित गरिने बताए । धनगढीस्थित नवजीवन अस्पतालका प्रमुख कार्यकारी अधिकृत समेत रहेका खडायत समाजसेवी र बौद्धिक व्यक्तित्वका रूपमा परिचित छन्।
