कैलाली । सेती प्रादेशिक अस्पतालमा स्रोत भर्नाको रकम समयमा नआउनाले बीमा सेवामा समस्या हुन थालेको छ । स्रोत भर्नाको रकम १२ करोड ७५ लाख ५० हजार ९९५ रुपैयाँ समयमा नआउदा बीमा सेवामा समस्या हुन थालेको हो ।
सेती प्रादेशिक अस्पतालले आर्थिक बर्ष २०८१।०८२ मा स्वास्थ्य मन्त्रालय र स्वास्थ्य बीमा बोर्डलाई मागदावी गरेको रकम १९ करोड ५९ लाख ८० हजार ९४३ भएपनि ६ करोड ८४ लाख २९ हजार ९४८ रुपैयाँ मात्रै आएको अस्पतालका सूचना अधिकारी किशोरप्रसाद श्रेष्ठले निशाना न्युजलाई जानकारी दिए ।
१२ करोड बढी रकम अपुग हुँदा सेवाग्राहीलाई औषधी अपुग हुने गरेको उनले बताए । ‘बीमाको नियम अनुसार सेवाग्राहीलाई ३ महिनाको लागि औषधी उपलब्ध गराउने हो’ उनले भने ‘रकम अभावका कारण घटाएर एक महिनाको मात्र दिने गरेका छौँ ।’ समयमै भुक्तानी आएन भने बीमा सेवामा समस्या हुने उनले बताए ।
स्वास्थ्य बीमापछि सेवाग्राही बढे
नेपाल सरकारले २०७२ श्रावण १ गतेवाट स्वास्थ्य बीमाको सुरुवात गरेपछि सेती प्रादेशिक अस्पतालमा सेवाग्राही संख्या बढेको उनले बताए । आर्थिक वर्ष २०८०।८१ मा स्वास्थ्य बीमा गराएका ६० हजार ९७७ जना व्यक्तिले अस्पतालमा सेवा लिएको उनले बताए । त्यस्तै,२०८१।०८२ मा ८२ हजार ११० जनाले सेवा लिएको सेती प्रादेशिक अस्पतालको तथ्यांकमा उल्लेख छ ।
उनले भने ‘सेवाग्राही बढेका छन् ।आर्थिक वर्ष २०८०।८१ मा भन्दा २०८१।०८२ मा २० हजार बढीले सेवा लिएको देखिन्छ ।’ दैनिक ६ सय जना अस्पतालमा सेवा लिन आउने गरेको उनले बताए ।
बीमामा आवद्ध भएका सुदूरपश्चिमका ९ वटै जिल्लाबाट रेफर भएर आएका बिरामी पनि यहाँ आउने गरेको उनले बताए । अस्पतालमा विशेषज्ञ ,विशिष्टकृत, एमआरआई,सिटीस्क्यान,ल्याव,इको लगायत अप्रेसन सेवा उपलब्ध रहेको उनले बताए । बिमामा आबद्ध भएका व्यक्तिहरुबाट सेवामा लाग्ने रकमको १० प्रतिशतमात्र सेवा शुल्क लिने गरिएको उनले बताए ।
हाल सम्म स्वास्थ्य बिमा गराएका सेवा ग्राहीका लागी अस्पतालले एक हजार २८९ ईन्जेक्सन तथा मेडिसियनका औषधी र २५ प्रकारका सर्जिकल सम्बन्धिका औषधी उपलब्ध गराउदै आएको उनको भनाइ छ ।
मुटुरोग,क्यान्सर, मृर्गौला ,स्पाईनल,कर्डईन्जोइरी,हेड ईन्जोइरी,सिकलसेल,पार्किङसुनिजम,अल्जाइमर रोग लागेकाहरुका लागि बीमाबाट रोगको सिफारिसको आधारमा थप दुई लाख बराबरको उपचार सेवा उपलब्ध गराइने गरेको उनले बताए ।
