काठमाडौं । देशका विभिन्न स्थानमा भएका छुट्टाछुट्टै सवारी दुर्घटनामा पाँच जनाको मृत्यु भएको छ । काठमाडौं महानगरपालिका–३२ स्थित सडकमा बा. प्र.०१–००४ ख ३२८७ नम्बरको ट्याङ्करले बा.प्र.०२–०३३ प २५४८ नम्बरको मोटरसाइकललाई बुधबार राति ठक्कर दिँदा मोटरसाइकलमा सवार कोटेश्वर बस्ने काभ्रेपलान्चोक रोशी गाउँपालिका–३ घर भएका २५ वर्षीय नवराज तुम्सिङ मगरको मृत्यु भएको छ ।
दुर्घटनामा गम्भीर घाइते भएका उनको केएमसी अस्पताल सिनामंगलमा थप उपचारको क्रममा मृत्यु भएको हो । साथै दुर्घटनामा घाइते भएका मोटरसाइकल चालकको सोही अस्पतालमा उपचार भइरहेको जनाइएको छ । ट्याङ्कर चालकलाई प्रहरीले नियन्त्रणमा लिएको छ ।
त्यस्तै,मोरङको सुन्दरहरैंचा नगरपालिका–४ स्थित सडकमा को. ३८ प ९६५ नम्बरको मोटरसाइकलको ठक्करबाट पैदलयात्री सोही नगरपालिका–६ बस्ने ७० वर्षीया लिलम दाहालको मृत्यु भएको छ । बुधबार राति भएको उक्त दुर्घटनामा गम्भीर घाइते भएकी उनको बिराट नसिङ होम विराटनगरमा उपचारको क्रममा बिहीबार बिहान मृत्यु भएको जनाइएको छ । मोटरसाइकल चालकलाई प्रहरीले नियन्त्रणमा लिएको छ ।
गोरखाको गोरखा नगरपालिका–१० बिरेनचोकस्थित सडकमा लु. ६१प ४६८५ नम्बरको मोटरसाइकलको ठक्करबाट पैदलयात्री सोही ठाउँ बस्ने ७० वर्षीय क्षेत्र बहादुर थापाको बुधबार राति मृत्यु भएको छ । ठक्करबाट गम्भीर घाइते भएका उनको सरकारी अस्पताल भरतपुरमा थप उपचारको क्रममा मृत्यु भएको हो । मोटरसाइकल चालकलाई प्रहरीले नियन्त्रणमा लिएको छ ।
सप्तरीको अग्निसाईर कृष्णसावरण गाउँपालिका–३ स्थित सडकमा स. ८ प ५९१९ नम्बरको मोटरसाइकलको ठक्करबाट साइकलयात्री सोही ठाउँ बस्ने ३० वर्षीय शत्रुधन सदाको गए राति मृत्यु भएको छ । ठक्करबाट गम्भीर घाइते भएका उनको छिन्नमस्ता अस्पताल राजबिराजमा उपचारको क्रममा मृत्यु भएको हो । साथै दुर्घटनामा घाइते भएका अन्य १ जना साइकलयात्रीको सोही अस्पताल र मोटरसाइकल चालक र मोटरसाइकलमा सवार १ जनाको गजेन्द्र नारायण सिंह अस्पताल राजबिराजमा उपचार भइरहेको छ ।
उदयपुरको उदयपुरगढी गाउँपालिका–७ अधेरीस्थित सडकमा प्र.१.०२–९९१ ख ९२६० नम्बरको ट्रक अनियन्त्रित भई बिहीबार बिहान दुर्घटना हुँदा चालक त्रियुगा नगरपालिका–४ बगाहा बस्ने ३५ वर्षीय जिवन विकको मृत्यु भएको छ । दुर्घटनामा गम्भीर घाइते भएका उनको जिल्ला अस्पताल उदयपुरमा उपचारको क्रममा मृत्यु भएको प्रहरीले जनाएको छ। दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।
