प्रदेश सभाबाट २०७५ असोज १२ गते प्रदेशको नाम सुदूरपश्चिम र राजधानी गोदावरी २ र ४ तेघरीमा हुने गरी दुईतिहाई बहुमत सदस्यले पारित गरेको थियो । तर पछिल्लो समय राजधानी सार्ने बिषय एकाएक चर्चामा आउन थालेपछि गोदावरी नगरपालिकाका नागरिकको भनाइ के छ त ? सोही बिषयमा निशाना न्युजले उनीहरुको भनाइ जस्ताका त्यस्तै प्रस्तुत गरेको छ ।
नेपाली कांग्रेस गोदावरी नगरगरपालिकाका नगर कमिटी सचिव अशोकराज देवकोटा :
दुई तिहाई बहुमत प्रदेश सभा सदस्यले पारित गरेको कुरा सार्ने बिषय वाहियात हो । यदि सार्ने कोसिस भइहाल्यो भने यहाँका राजनितिक दल नागरिक समाज सबै मिलेर आन्दोलनको घोषणा गरेर प्रदेश सरकारलाई दबाब दिन हामी पछि हट्ने छैनौँ ।
पहाडी ७ जिल्ला र तराईका २ जिल्ला जोड्ने उपयुक्त स्थान गोदावरी नगरपालिकाको २ र ४ वडा भएकोले यहाँबाट राजधानी सार्नु ठूलो भुल हुने उनको भनाइ छ ।
गोदावरी नगरपालिका-२ तेघरीका स्थानीय लालसिंह धामी :
बिगत लामो समयदेखि राजधानी गोदावरीमै हुन्छ, काम अघाडि बढ्ने भन्ने कुरा थियो । यहाँ बोर्ड पनि लगाइ सकेको छ । एक्कासी यस्तो कुरा किन आयो र के का लागि आयो ? यदी राजधानी गोदावरीबाट अन्य स्थानमा सार्न खोजे यस क्षेत्रका नागरिक आन्दोलनमा उत्रन बाध्य हुने उनले बताए । भारतीय खुल्ला सीमा नाका छ । कस्ले भन्यो यहाँबाट राजधानी सराउने ? उनले प्रतिप्रश्न गरे ।
गोदावरी नगरपालिका-२ बस्ने कलादेवी थापा :
राजधानी गोदावरी नै हुनु पर्छ । सबै दलहरु मिलेर एक स्वरमा पहिला पनि यही क्षेत्रमा तोकेको थियो अहिले पनि यही क्षेत्रमा तोक्नु हुने छ भन्ने मलाई लागेको छ । यदी राजधानी साच्चै यस क्षेत्रबाट अन्यत्र सार्न खोजेको चालबाजी हो भने यस क्षेत्रका नेताहरुलाई हामी छोड्ने छैनौँ। यस क्षेत्रका जनता एकजुट भएर राजधानी सार्ने निर्णयका विरुद्ध एक साथ प्रतिवाद गर्ने उनको तर्क छ ।
