धनगढी । नेकपा (माओवादी केन्द्र)का केन्द्रीय सदस्य एवं पूर्वमन्त्री रमेशसिंह धामीले सहिद भीमदत्त पन्त क्रान्तिकारी र समाज परिवर्तनका मुख्य प्रवर्द्धक भएको बताएका छन् ।
अखिल नेपाल किसान महासंघ (क्रान्तिकारी केन्द्र) कैलालीले आज धनगढीमा आयोजनाका गरेको ३४औं किसान सहिद दिवस तथा ७२औं भीमदत्त पन्त स्मृति दिवसमा बोल्दै उनले यस्तो बताएका हुन् ।
उनले भने ‘भीमदत्त पन्तले तत्कालीन पञ्चायती शासकले किसानमाथि गरेको उत्पीडनका,जातीय विभेदविरुद्ध क्रान्तिको उद्घोष गर्नुभयो । उहाँले त्यसलाई पूरा गर्न नसकेपनि किसानको रक्षा,जातीय विभेदको अन्त्यका लागि आफ्नो एउटा क्रन्तिको उद्घोष गर्नुभयो ।’
उनले भने भीमदत्त पन्तले गरेका सत्कर्म,सही विचार,सही कदम अनुकरणीय रहेको बताए । त्यस्तै कार्यक्रममा बोल्दै उनले किसानमाथि अहिले पनि शोषण रहेको बताउँदै अहिले पनि किसान ठगिरहेको र लगानी अनुसारको प्रतिफल नपाउने अवस्था रहेको बताए ।
त्यस्तै उनले माओवादी केन्द्रको कार्यदिसा समाजवाद उन्मुख रहेको बताउँदै यसका लागि पार्टी भित्रैका केही नेता तयार नरहेको बताए ।
उनले भने ‘पार्टीको संस्थागत निर्णयलाई जनता र कार्यकर्तासम्म लैजान सक्दैनौँ । तबसम्म पार्टी विस्तार हुँदैन । पार्टी बलियो हुँदैन् ।’
कार्यक्रममा किसान नेता अनिल बोहरा,बुद्धिजीवी नेता केशव सुवेदी, माओवादी केन्द्र धनगढी उपमहानगर कमिटी अध्यक्ष बलबहादुर ऐर,उपाध्यक्ष रमेश भट्टराई,महिला नेता शान्ति अधिकारी, धनगढी उपमहानगरपालिका वडा नं ६ का अध्यक्ष भागीराम चौधरी लगायतको उपस्थिति रहेको थियो । कार्यक्रम अखिल नेपाल किसान महासंघ(क्रान्तिकारी केन्द्र) कैलालीका अध्यक्ष लोकेन्द्र जोशीको अध्यक्षता भएको थियो ।
