कैलाली । काम गर्न सके आफ्नै देशमा केही गर्न सकिन्छ भन्दै गोदावरी नगरपालिका–२ तेघरी बस्ने ४६ वर्षीय सुरेन्द्रबहादुर साउद भैँसीपालन व्यवसायमा लागेका छन् । उनी अहिले भैँसीपालन व्यवसायमा रमाउन थालेका छन् । वार्षिक ३ लाख ६० हजार भाडा तिर्ने गरी ३४ कठ्ठा जमिनमा उनले व्यवसाय सुरु गरेका हुन् ।

२०५६ सालमा आर्मीको जागिर सुरु गरेका उनी २०७६ मा अवकाश भए । अवकासपछि विदेशको युएई गए र दुवई प्रहरीको रुपमा ५ वर्ष काम गरे । साउद लगायत एक हजार ८ सय जनाको टुकडीलाई अन्तर्राष्ट्रिय बिमानस्थलको सुरक्षामा खटाइएको थियो । पछि सरकारले बिमानस्थल सुरक्षाका लागि आर्मीलाई दिएको र स्वतः आफूहरुको अवकाश भएको उनले बताए । ‘म सँगै काम गरेका अन्य साथीहरु कामको खोजीमा रशिया तिर लागे’ उनले भने ‘आफू नेपालमै केही गर्नुपर्छ भनेर नेपाल फर्केर आएको छु ।’ सोही सोचका साथ आफूले यही भदौ १ गतेबाट ४ भैँसी र दुई वटा गाईबाट व्यवसाय सुरु गरेको उनले बताए ।

‘योजना ठूलो छ । अहिले भैँसीलाई खानाको लागि घाँस,भुसा छैन । जमिनमा घाँस लगाइरहेको छु । निकट भविष्यमा ४० भैँसी लैनु तयारी अवस्थामा राख्ने रहेको उनले बताए । अहिले २ वटा मुर्रा भैँसी, १ जर्फावादी भैँसी र १ लोकल भैँसी २ वटा गाई रहेको उनले बताए । भौतिक संरचना निर्माणमा २० लाख र भैँसीमा ६ लाख खर्च भएको उनले बताए ।

अहिले ४० लिटर दूध बेच्ने गरेको र प्रतिलिटर ९० रुपैयाँमा विक्री गर्ने गरेको उनले बताए । मासिक एक लाखको कारोवार हुने गरेको उनको भनाइ छ । सबै खर्च कटायर मासिक ६० हजार बचत गर्ने गरेको उनले बताए । उनले भने ‘अहिले खान लाउन ठीकै पुग्छ । लगत्तै गड्यौला मल उत्पादन गर्ने र ब्राण्डिङसहित ५५ केजीको पाकेट निर्माण गरी बेच्ने योजना छ ।’

उनले भने ‘मलाई विदेशमा काम गर्दाको पीडा थाहा छ । नेपालबाट गएका नेपालीहरुको हालत के हुन्छ सबै कुराको अनुभव छ । विदेश रहदै नेपालमा सुहाउँदो के छ सोचिरहेको थिए । सोही योजनाका साथ नेपाल फर्केर आएको छु । काम पनि सुरु गरेको छु ।’ काम गर्दै जादा आफू सफल भइयो भने यहाँका युवाहरुलाई विदेश जान रोक्ने सोच रहेको उनले बताए । विदेशमा कमाउने तलब नेपालमै दिएर काम लगाउने उदेश्य आफ्नो रहेको उनको भनाइ छ ।

स्याउखेतीको सम्भाव्यता अध्ययन गरिरहेको र केही स्याउका बोटा पनि लगाएको उनले बताए । सरकारले वास्तविक कृषकलाई सहुलियत दिने योजना ल्याउन आवश्यक रहेको उनले बताए । यहाँका मानिसहरु भारतबाट उत्पादित तरकारी ,फलफूल खान बाध्य भएको र सरकारले कृषकलाई दिने राम्रो योजना नहुनुले यो काम भइरहेको आफ्नो बुझाइ रहेको उनले बताए ।