धनगढी । जलवायु परिवर्तन,कृषि प्रणाली र कृषिमा युवा सहभागिताका लागि सञ्चार माध्यमको भूमिका विषयक छलफल कार्यक्रम गरिएको छ । सामुदायिक रेडियो प्रशारक संघ सीआईएनको आयोजनामा आज धनगढीमा प्रदेशस्तरीय छलफल कार्यक्रम गरिएको हो ।

कार्यक्रममा कृषि क्षेत्रको रिपोटिङको अवस्था,चुनौति र अवसर लगायतका बारेमा छलफल गरिएको थियो । कार्यक्रममा सयुक्त राष्ट्र संघीय कृषि तथा खाद्य संगठनको बारेमा सञ्चार विज्ञ संघर्ष भट्टराईले जानकारी गराएका थिए । त्यस्तै सुदूरपश्चिम प्रदेशको भूमि व्यवस्था,कृषि तथा सहकारी मनत्रालयका सूचना अधिकारी राजकुमार झाले मन्त्रालयबाट कृषि क्षेत्रमा सञ्चालन भइरहेका कार्यक्रमबारे प्रस्तुतिकरण राखेका थिए । उनले किसानलाई प्रोत्साहित गर्न मन्त्रालयबाट विभिन्न अनुदानका कार्यक्रम सञ्चालन गरिएको बताए ।

त्यस्तै, कार्यक्रममा कृषि विकास निर्देशनालय डोटीका निमित्त प्रमुख टिकेन्द्र कुश्मीले सुदूरपश्चिममा कृषि क्षेत्रका मुद्दाहरुका बारेमा प्रस्तुतिकरण गरेका थिए ।

उनले खेतीयोग्य जमीनको खण्डिकरण,जमीन बाँझो हुनु,कृषिमा श्रमको अभाव,बढ्दो लागत,कृषि क्षेत्रमा घट्दो नाफा,बजारको न्युन पहुँच जस्ता समस्या रहेको बताए ।

उनले कृषिमा जलवायु परिवर्तनको प्रभाव,बैंक,निजी क्षेत्र,वित्तयि संस्थाको कृषि क्षेत्रमा लगानी कम रहेको बताए । उनले सुदूरपश्चिममा ८४ प्रतिशत जनसंख्या कृषिमा संलग्न रहेको बताए ।

कार्यक्रममा बाली विज्ञ प्रशान्त पन्तले केराखेतीमा लाग्ने रोग,केराखेतीको अवस्था,चुनौतिलगायत बिषयमा प्रस्तुतिकरण गरेका थिए । सञ्चार विज्ञ तुला अधिकारीले कृषिमा लाग्न युवाललाई उत्प्रेरित गर्न सञ्चार माध्यमको भूमिका बारेमा प्रस्तुतिकरण गरेका थिए ।

कार्यक्रममा कृषिमा युवा पुस्ताको सहभागिताका बारेमा प्यानल डिस्कसन गरिएको थियो । प्यान डिस्कसनमा कृषि ज्ञान केन्द्र कैलालीका वरिष्ठ कृषि प्रसार अधिकृत टेकबहादुर बिष्ट,युवा उद्यमी सुशीला बिष्ट र युवाको तर्फबाट यज्ञश्वरी बोगटीको सहभागिता रहेको थियो ।

प्यानल डिस्कसनमा बोल्दै वरिष्ठ कृषि प्रसार अधिकृत टेकबहादुर बिष्टले पछिल्लो समय कृषि क्षेत्रमा उपलब्धि बढ्दै गएको बताए । उनले पहिले भारतबाट तरकारी आयात बढी हुने गरेकामा पछिल्लो समय पहाडी जिल्लाबाट तरकारी तराईका जिल्लामा आउने गरेको बताए । सरकारले विभिन्न अनुदानका कार्यक्रम सञ्चालन गर्दै आएको र युवाको सहभागिता पनि कृषि क्षेत्रमा रहेको बताए ।

युवा उद्यमी सुशीला बिष्टले आफूले फूलखेती गर्दै आएको र आम्दानी पनि राम्रै हुने गरेको बताइन् । उनले फूलखेतीमा चुनौति समेत रहेको बताउँदै तालिम नपाइनु,बीउबिजन पाउन समस्या हुने गरेको बताइन् ।

प्यानल डिस्कसनमा यज्ञश्वरी बोगटीले कृषि क्षेत्रमा युवा सहभागिता भएपनि प्रतिफल नपाउँदा युवा पलायन हुने गरेको बताइन् । उनले सरकारले युवालाई कृषिमा प्रोत्साहन गर्ने नीति तथा योजना ल्याउनु पर्ने बताइन् ।