कैलाली । धनगढी उपमहानगरपालिका- ७ देवहरियामा रहेको चन्द्रमुखी ताल आन्तरिक पर्यटकको रोजाईमा पर्न थालेको छ ।
सुन्दर शान्त वतावरण,चारैतिर हरियाली मनेहरा सामुदायिक वन हात भित्र रहेको सो ताल आन्तरिक पर्यटकको रोजाईमा पर्न थालेको हो ।

कैलालीको टीकापुर,महेन्द्रनगर,धनगढी,भजनी,लम्कीचुहा, कञ्चनपुरको बेलौरी, लगायतका स्थानबाट आन्तरिक पर्यटक तालको अवलोकन गर्न आउने गरेका छन् ।

सरकारी,गैरसरकारी संस्थाका मानिसहरु र विभिन्न विद्यालयका विधार्थीहरु पनि तालको अवलोकन गर्न आउने गरेको ताल सञ्चालक लोकेन्द्र बिष्टले निशाना न्युजलाई जानकारी दिए ।

अरु दिन पाँच सय मानिसहरु र विदाको दिन चार हजार मानिसहरु तालको अवलोकन गर्न आउने गरेको उनले बताए । अहिले शुल्कको व्यवस्था नगरेको र घुम्न आउने पर्यटकलाई निःशुल्क गरेको तथा केही दिन पछाडि शुल्क लिने तयारी भइरहेको उनले बताए ।

अहिले डुङ्गा, झुला पिङ्गमा खेल्ने र पिकनिक तथा जन्मदिन मनाउनेहरुको लागि थोरै शुल्क लगाउने गरिएको उनले बताए ।
‘निर्माण केही बाँकी छ,निर्माण सम्पन्न पश्चात शुल्क लिने योजना छ’ बिष्टले भने ।

सरकारको २० प्रतिशत र आफ्नो ८० प्रतिशत लगानीमा तालको निर्माण गरिएको उनले बताए । उनले केही दिन भित्र बाँकी काम सम्पन्न हुने बताए । धनगढी बजारबाट छोटो दुरीमा रहेको सो ताल पिकनिक स्पोर्टको रुपमा पनि विकास भइरहेको उनले बताए ।

हाल तालमा एक डुङगा, दुईवटा काक्रिङ्ग,टापुपा दुईवटा झुला पिङ्ग,ताल वरिपरि पिकनिकका लागि स्टलहरु निर्माण गरिएको उनले बताए । तालमा जन्मदिन मनाउन र पिकनिक खान मानिसहरु आउने गरेको उनको भनाइ छ ।

यो ताललाई पिकनिक स्पर्ट बनाउने उदेश्यलले कामको थालनी गरेको उनले बताए । अहिले यो ताल सबैको रोजाईमा परेको उनले बताए ।