धनगढी । सुदूरपश्चिम प्रदेशका मुख्यमन्त्री खगराज भट्टले विश्वासको मत पाएका छन् ।
बुधबार बसेको प्रदेशसभा बैठकमा मुख्यमन्त्री भट्टले पेस गरेको विश्वासको मत सम्बन्धी प्रस्तावको पक्षमा ३१ मत र विपक्षमा १५ मत परेको हो ।
मुख्यमन्त्री भट्टले पेस गरेको प्रस्तावको पक्षमा बहुमत सदस्यले मतदान गरेको भन्दै सभामुख भीमबहादुर भण्डारीले प्रस्ताव बहुमतले स्वीकृत भएको घोषणा गरेका हुन् ।
भट्ट नेपालको संविधानको धारा १६८ को उपधारा २ बमोजिम गत साउन २९ गते मुख्यमन्त्रीमा नियुक्त भएका थिए । भट्ट नेकपा एमालेको समर्थनमा मुख्यमन्त्री बनेका थिए ।
मुख्यमन्त्रीमा नियुक्त भएको ३० दिनभित्र प्रदेशसभाबाट विश्वासको मत प्राप्त गर्नुपर्ने संवैधानिक व्यवस्थाअनुसार आज उनले विश्वासको मत लिएका हुन् ।
भट्टलाई नेकपाका २० जना सांसद र नेकपा एमालेका ११ जना सांसदले मत दिएका हुन् ।
