कैलाली । धनगढी उपमहानगरपालिकाको ‘उज्यालो धनगढी’ कार्यक्रमअन्तर्गत धनगढी १८ तुलशीबारीमा ४० औँ हाइमास लाइट जडान गरी सञ्चालनमा ल्याइएको छ।
एक वडा एक व्यापारीक केन्द्र कार्यक्रमलाई ध्यानमा राखी यो हाइमास लाइट जडान गरिएको हो।
धनगढी उपमहानगरपालिका वडा नम्बर १८ स्थित जतुलशीबारीमा जडान गरिएको हाइमास लाइटको वडा नम्बर १८ का वडा अध्यक्ष भुवन रिजालले उद्घाटन गरेका हुन्।
उपमहानगरपालिकाका अनुसार ‘उज्यालो धनगढी’ कार्यक्रमअन्तर्गत नगरका विभिन्न स्थानमा हाइमास लाइट जडान गर्ने कार्यलाई निरन्तरता दिइएको छ। सोही अभियानअन्तर्गत वडा नम्बर १८ तुलशीबारी क्षेत्रमा पनि हाइमास लाइट जडान गरिएको हो।
व्यस्त तथा सार्वजनिक आवागमनको महत्वपूर्ण क्षेत्र भएकाले यहाँ हाइमास लाइट सञ्चालनमा आएपछि रातिको समयमा हुने आवागमन तथा सार्वजनिक गतिविधिमा सहजता हुने अपेक्षा गरिएको छ।
उपमहानगरपालिकाले नगरका विभिन्न क्षेत्रलाई थप उज्यालो, सुरक्षित र व्यवस्थित बनाउने उद्देश्यसहित ‘उज्यालो धनगढी’ कार्यक्रम सञ्चालन गरिरहेको जनाएको छ।
