धनगढी । सुदूरपश्चिम प्रदेश सरकारले चालु आर्थिक वर्ष २०८३/८४ का लागि रु ३७ अर्ब ७० करोड ३९ लाख ६७ हजारको बजेट प्रस्तुत गरेको छ।
आइतबार प्रदेशसभाको बैठकमा आर्थिक मामिलामन्त्री चक्र मल्लले बजेट प्रस्तुत गरेका हुन् ।
प्रदेश सरकारले प्रस्तुत गरेको बजेटका लागि आन्तरिक राजस्व परिचालनबाट रु १ अर्ब ७२ करोड प्राप्त हुने अनुमान गरेको छ। नेपाल सरकारबाट राजस्व बाँडफाँटमार्फत रु १० अर्ब २४ करोड ९२ लाख ६७ हजार प्राप्त हुने अनुमान गरिएको छ।
त्यस्तै, सङ्घीय रोयल्टी बाँडफाँटबाट रु ७ करोड प्राप्त हुने अनुमान गरिएको छ। नेपाल सरकारबाट प्राप्त हुने वित्तीय समानीकरण अनुदानतर्फ रु ९ अर्ब ६ करोड ३३ लाख विनियोजन गरिएको छ।
प्रदेश सरकारले चालु आर्थिक वर्ष २०८३/८४ को बजेटबाट विनियोजन भई बचत हुने अनुमानित रकम रु ९ अर्ब ६५ करोडलाई पनि बजेटको स्रोतका रूपमा समावेश गरेको छ।
यसैगरी, सशर्त अनुदानतर्फ रु ६ अर्ब ३ करोड ५८ लाख, सङ्घीय समपूरक अनुदानबाट रु ३८ करोड ८० लाख र विशेष अनुदानबाट रु ५२ करोड ७६ लाख प्राप्त हुने अनुमान गरिएको छ।
