धनगढी । कैलालीको धनगढीस्थित हिमशिखर बहुउद्देश्यीय सहकारी संस्था लिमिटेडको १८औँ वार्षिक साधारणसभा सम्पन्न भएको छ । सहकारीको शनिबार धनगढीमा वार्षिक साधारणसभा सम्पन्न भएको हो ।
साधारण सभामा वार्षिक प्रतिवेदन प्रस्तुत गर्दै संस्थाका अध्यक्ष रोशन सिंहले संस्थाले स्थापना कालदेखि नै सदस्यहरूको आर्थिक, सामाजिक तथा व्यावसायिक विकासमा योगदान पु¥याउँदै आएको बताए ।
उनले सदस्य केन्द्रित वित्तीय तथा गैरवित्तीय सेवा प्रवाहमार्फत संस्थाले सदस्यहरूको विश्वास,अपनत्व र आकर्षण बढाउन सफल भएको बताए । अध्यक्ष सिंहले आगामी चार वर्षका लागि प्राप्त नेतृत्वको जिम्मेवारीलाई सम्मान गर्दै संस्थाको हित र दिगो विकासका लागि इमानदारीपूर्वक काम गर्ने प्रतिबद्धता व्यक्त गरे ।
संस्थालाई सुशासित, पारदर्शी,जवाफदेही र विश्वासिलो सहकारीका रूपमा स्थापित गर्नु वर्तमान सञ्चालक समितिको मुख्य लक्ष्य रहेको उनको भनाइ थियो ।
संस्थाका व्यवस्थापक महेन्द्र शाहीले संक्षिप्त विवरणसहितको प्रतिवेदन पेश गर्दै गत आव २०८२/०८३ मा यथार्थ कुल सम्पत्ति रु.९७ करोड ८३ लाख ३६ हजार रहेकोमा आव २०८३।०८४ मा रु १ अर्ब ५ करोड ४१ लाख ११ हजार हुने अनुमान गरिएको बताए ।
त्यस्तै,संस्थाको शेयर पुँजी अघिल्लो आवमा रु ४५ लाख ५३ हजार ९५८ ले वृद्धि भइ आव २०८२/८३ मा रु ५ करोड ११ लाख ८८ हजार २५८ रहेको उनले बताए ।
त्यस्तै आव २०८२/०८३ मा संस्थाको कुल बचत निक्षेप रु ७० करोड २९ लाख ४६ हजार रहेका उनले बताए । उनले आव २०८२/८३ मा संस्थाको कुल आम्दानी रु १ करोड २० लाख ४६ हजार रहेको बताए ।
कार्यक्रममा संस्थाका उपाध्यक्ष विमल जोशीले स्वागत मन्तव्य राखेका थिए । साधारण सभाको सञ्चालन संस्थाका सचिव वसन्ती भण्डारीले गरेकी थिइन् । साधारण सभामा हिमशिखर सहकारी संस्था लिमिटेडका सबै शाखाका कर्मचारी शेयर सदस्य ,ऋणी लगायत हिमशिखर सहकारीमा आबद्ध सरोकारवाला सबैको उल्लेखनीय उपस्थिति रहेको थियो ।
