काठमाडौं- नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’को नेतृत्वमा नयाँ सरकार बनेलगत्तै ३५ महिनादेखि बन्द रहेको रसुवागढी नाका खुलेको छ । यससँगै चीनले नेपाली वस्तुमाथि लगाउँदै आएको अघोषित प्रतिबन्ध पनि फुकुवा गरेको छ । रसुवा भन्सार कार्यालयका अनुसार ३५ महिनादेखि नेपाली सरसामान लान बन्द गरिएको उक्त नाका मंगलबारदेखि खुला भएको छ ।
कोभिड–१९ महामारी सुरु भएयता पहिलो पटक नेपाली वस्तु निर्यात गर्न सक्ने गरी रसुवागढी नाका खुला भएको हो । ल्हासा स्थित महावाणिज्य दुतावासको पहलमा २५ डिसेम्बरबाट नाका खुला गर्ने भनिएकामा मंगलबारदेखि निर्यात सुरु भएको भन्सार विभागका प्रवक्ता पुण्यविक्रम खड्काले जानकारी दिए ।
त्यस्तै, चीनले केरुङ–काठमाडौँ रेलमार्गको सम्भाव्यता अध्ययन गर्न टोली पठाएको छ भने उत्तरी नाकामा औपचारिक रूपमा आवागमन सञ्चालन गर्न सकारात्मक देखिएको छ। कोरोना संक्रमणको जोखिम देखाउँदै चीनले नेपाली वस्तु निर्यातमा रोक लगाउँदै आएको थियो । जसका कारण रसुवागढी र तातोपानी नाकाबाट नेपाली वस्तु निर्यात बन्द थियो ।
मंगलबार नाका खुलेसँगै नेपालबाट ५० लाख ७० हजार रुपैयाँ मूल्य बराबरको बाँसको मुढा, तामाका भाँडाजस्ता वस्तु चीनतर्फ निर्यात भएको रसुवागढी भन्सार कार्यालयले जनाएको छ । मंगलबार नेपालबाट ६ वटा ट्रकमा नेपाली वस्तु चीनतर्फ निर्यात भएको रसुवाका सहायक प्रमुख जिल्ला अधिकारी दयाराम पौडेलले बताए ।
कोरोना महामारीपछि २०७६ माघ १५ देखि रसुवागढी नाकाबाट सामान निर्यात र मानिसको आवतजावत बन्द थियो । सोमबार मात्रै ल्हसास्थित नेपाली महावाणिज्य दूतावासलाई चिनियाँ अधिकारीले नाकाबाट नेपाली वस्तु आयात खोल्ने जानकारी गराएका थिए ।
