धनगढी- प्रधानमन्त्री पुष्पकमल दाहाल ‘प्रचण्ड’ शुक्रवार धनगढी आउने कार्यक्रम तय भएको छ । मंसिर २२ गते शुक्रवारदेखि धनगढीमा सुरु हुन गइरहेको सुदूरपश्चिम महोत्सवको उद्घाटन गर्न प्रधानमन्त्री प्रचण्ड धनगढी आउन लागेका हुन् ।
सुदूरपश्चिम महोत्सव आयोजक कैलाली उद्योग वाणिज्य सङ्घका अध्यक्ष पुष्पराज कुँवरले १७ औँ संस्करणको महोत्सव उद्घाटन गर्न प्रधानमन्त्री आउने कार्यक्रम निश्चित भएको बताए ।
अध्यक्ष कुँवरले भने, ‘‘प्रधानमन्त्री आउने भएपछि महोत्सवको गरिमा अझै बढ्नेछ, यस क्षेत्रका व्यवसायीहरूले भोग्नुपरेका समस्या र अहिलेको अवस्थाबारे प्रधानमन्त्रीसँग व्यवसायीले कुरा राख्न पाउनेछन् । उद्योग वाणिज्य सङ्घले पनि यस क्षेत्रका व्यवसायीहरूका समस्या प्रधानमन्त्री समक्ष राख्नेछ ।’’
अध्यक्ष कुँवरले प्रधानमन्त्री आउने तय भएपछि त्यही अनुसारको तयारी गरेको जानकारी दिए । ‘‘विगतका वर्ष झैँ यो पटक पनि प्रमुख अतिथिलाई पूरा नभएका मागहरूको बारेमा जानकारी गराउने सङ्घको तयारी छ । महोत्सव १० दिनसम्म चल्नेछ । यस पटक महोत्सवको टिकट खल्ती एप्सबाट पनि लिन सकिने व्यवस्था सङ्घले मिलाएको छ ।
